QR Prezıdenti Іs Basqarmasynyń ujymy qarttarǵa arnap merekelik aktsııa uıymdastyrdy
Búgin munda QR Prezıdenti Іs Basqarmasynyń qyzmetkerleri ortalyq turǵyndary úshin qaıyrymdylyq aktsııasyn ótkizdi, dep habarlaıdy QazAqparat tilshisi.
Ortalyq turǵyndary búgin erekshe ádemi. Josparlanǵan kotsert týraly estigen olar ózderiniń sándi de saltanatty kóılekteri men kostıýmderin kıip, merekelik shara ótetin zalǵa kelip, oryndaryna jaıǵasyp jatty.
QR Prezıdenti Іs Basqarmasynyń qyzmetkerleri qarttarmen áńgimelesip, olardy merekemen quttyqtap, kóńil-kúıin kóterýge tyrysty.
«Naýryzdy merekeleý aıasynda Prezıdent Іs Basqarmasy jáne oǵan qarasty uıymdardyń qyzmetkerleri «Sharapat» áleýmettik qyzmet kórsetý ortalyǵynyń turǵyndaryna keldi. Biz qur qol kelgen joqpyz. Olardyń kóńil-kúıin kóterý úshin merekelik kontsert usynyp, shaǵyn syılyqtar da daıyndadyq», - dep atap ótti kadr qyzmeti meńgerýshisiniń orynbasary Sholpan Jumaǵulova.
Aıta keteıik, QR PІB mundaı is-sharalardy jıi ótkizedi. Máselen, byltyr Balalar jyly aıasynda Prezıdent Іs Basqarmasynyń qyzmetkerleri balalar úıine baryp, kishkentaı búldirshinderge kásibı aspazdar tamaq ázirleý boıynsha sheberlik saǵatyn ótkizdi. Sonymen qatar, Býrabaıda arnaıy ekskýrsııa uıymdastyryldy.
QR PІB Medıtsınalyq ortalyǵy basshysynyń orynbasary Lıýdmıla Bıýrabekova buǵan deıin PІB qyzmetkerleri balalar úıleriniń tárbıelenýshilerimen kezdeskenin atap ótti. Búginde osy ıgi dástúrdiń jalǵasy retinde olar «Sharapat» ońaltý ortalyǵynyń turǵyndaryn Naýryz merekesimen quttyqtaýǵa arnaıy keldi.
QR Prezıdenti Іs Basqarmasyna qarasty uıymdar qyzmetkerlerinen basqa, merekelik kontsertke Astana qalalyq jumyspen qamtý jáne áleýmettik qorǵaý basqarmasynyń basshysy Ilıa Skýb qatysty.
«Búgingi is-shara Naýryz merekesin atap ótýge arnalǵan. Bul - jańarý men jańǵyrý merekesi. Osyǵan baılanysty biz tıisti is-shara men merekelik túski as daıyndadyq. Biz osyndaı sharalardy turaqty negizde ótkizemiz. Munda 300-ge jýyq adamǵa áleýmettik qyzmet kórsetiledi. Ótken aptada úıde qyzmet alatyndar úshin Naýryz merekesin atap óttik», - dedi Ilıa Skýb.
Memlekettik kúzet qyzmetiniń orkestri uıymdastyrǵan merekelik kontsert aýqymdy mýzykalyq keshterden esh kem túspedi. Onda Aızat Qarabekova, Asylhan Shalqarov, Erkebulan Sársembekov, Gúlsim Myrzabekova, Baýyrjan Nurmuhanov sııaqty orkestr músheleri mereke qonaqtary úshin arnaıy óner kórsetti. Olar halyqaralyq jáne respýblıkalyq baıqaýlarda jeńiske jetken ánderin shyrqap, kórermen qoshemetine bólendi.
Keıin Naýryz meıramyna oraı merekelik dastarhan jaıyldy.
Shara barysynda QR Prezıdenti men Úkimeti ákimshiliginiń ákimshilik ǵımarattar dırektsııasy, Memlekettik rezıdentsııalar dırektsııasy, Medıtsınalyq ortalyq aýrýhanasynyń jáne Materıaldyq-tehnıkalyq qamtamasyz etý basqarmasynyń ákimshilik ǵımarattar dırektsııasynyń ókilderi ortalyqtaǵy azamattardyń kóńilin kóterip, qoldaý bildirdi. Bul uıymdardyń barlyǵy QR Prezıdenti Іs Basqarmasynyń qaramaǵyna kiredi.
«Bizge osy ortalyqqa baratynymyzdy habarlanǵan kezde, birden dámdi taǵamdar daıyndaýymyz kerek dep oıladyq. Biz naýryz kóje, baýyrsaq, shubat sııaqty ulttyq taǵamdarymyzdy, sondaı-aq ártúrli salattar ázirledik», - dep atap ótti Memlekettik rezıdentsııa dırektsııasynyń bas aspazshysy Ádilet Luqpanov.
Ákimshilik ortalyq dırektsııasynyń qoǵamdyq tamaqtaný bóliminiń bastyǵy Jámıla Aıdarbekova mázir jasaý kezinde ortalyq turǵyndarynyń tamaqtaný erekshelikteri eskerilgenin aıtty. Sondyqtan egde jastaǵy adamdar úshin ulttyq taǵamdardan basqa, mázirde kókónister men jemister, salattar boldy.
Budan basqa, QR Prezıdenti Іs Basqarmasy qyzmetkerleri ózderiniń jeke kitaphanalarynan jınaqtalǵan kitaptardy ortalyqqa syıǵa tartty. Sondaı-aq, «Sharapat» ortalyǵynyń turǵyndaryna suranysyna baılanysty ózge de syılyqtar tabystaldy.