QR Prezıdenti Іs basqarmasy Medıtsınalyq ortalyǵynyń Qostanaı oblysyndaǵy kúnderi ótedi

ASTANA. QazAqparat – QR Prezıdenti Іs basqarmasyna (QR PІB) qarasty Medıtsınalyq ortalyǵynyń mamandary óńirlerdegi kúnder aıasynda 21-24 tamyz aralyǵynda Qostanaı oblysyna saparlaıdy. QazAqparat bul týraly QR PІB-tiń baspasóz qyzmetine silteme jasap habarlaıdy.

Delegatsııa Medortalyqtyń JCI, ISO, GLP, GMP halyqaralyq standarttaryna saı mekemeleri – elordadaǵy aýrýhana men Almatydaǵy Ortalyq klınıkalyq aýrýhanasynyń jetekshi neırohırýrg, arıtmolog, gınekolog, travmatolog jáne basqa da mamandarynan quralǵan. Bilikti dárigerler medıtsınalyq mekemelerde sheberlik sabaqtar ótkizedi, halyqqa tegin konsýltatsııalyq kómek beredi. Sondaı-aq Qostanaı oblystyq aýrýhanasynda, Qostanaı qalalyq kópsalaly onkologııalyq aýrýhanasynda, Qostanaı oblystyq kardıologııa ortalyǵynda jáne Rýdnyı qalalyq aýrýhanasynda kúrdeli operatsııa jasaıdy.

Delegatsııa quramynda kelesi mamandar bar:

Myńjylqy Berdiqojaev – Medortalyq aýrýhanasy hırýrgııa jónindegi dırektordyń orynbasary, joǵary sanatty dárigeri, neırohırýrgi (oblys turǵyndaryna tegin konsýltatsııa beredi, operatsııa jasaıdy);

Aıan Abdrahmanov – Medortalyq aýrýhanasy bas arıtmology, medıtsına ǵylymdarynyń doktory, qaýymdastyrylǵan professory (Rýdnyı qalalyq kópsalaly aýrýhanasynda kúrdeli operatsııalar jasaıdy).

Raýshan Qarabaeva – Medortalyq aýrýhanasy dırektorynyń emdeý jónindegi orynbasary, medıtsına ǵylymdarynyń doktory, joǵary sanatty dáriger, qaýymdastyrylǵan professor («Klınıkalyq-farmakologııalyq bólimsheniń qyzmeti» taqyrybynda dáris oqıdy);

Nazar Seıdalın – Medortalyq aýrýhanasynyń bas onkology («Sút bezi obyry men melanoma kezindegi saqtandyrýshy lımfatúıinderdiń bıopsııasy» taqyrybynda dáris oqıdy);

Marat Sarshaev – Ortalyq klınıkalyq aýrýhananyń neırohırýrgııa ortalyǵynyń meńgerýshisi, birinshi sanatty neırohırýrg, rentgenhırýrg;

Sáken Moldaǵalıev – Ortalyq klınıkalyq aýrýhananyń travmatologııa jáne ortopedııa bóliminiń meńgerýshisi, joǵary sanatty travmatolog;

Asqar Ibraev-Rysbekov – Ortalyq klınıkalyq aýrýhananyń gınekologııa bólimshesiniń joǵary sanatty akýsher-gınekology.

Qostanaı oblastyq aýrýhanasynda kelýshilerdi 22 tamyz kúni saǵat 12:00-14:00 aralyǵynda neırohırýrg Myńjylqy Berdiqojaev, 23 tamyzda 09:00-12:00 aralyǵynda travmatolog Sáken Moldaǵalıev, 09:00-12:00 aralyǵynda gınekolog Asqar Ibraev-Rysbekov qabyldaıdy.

Oblystaǵy kúnder aıasynda Medortalyqqa qarasty Sanıtarlyq-epıdemıologııalyq ortalyq, Medıtsınalyq tehnolgııalar jáne aqparattyq júıeler ortalyǵy, «Oq-Jetpes» emdeý-saýyqtyrý kesheni jáne «Qarlyǵash» balabaqshasy syndy mekemelerdiń qyzmetkerleri trenıng ótkizip, tájirıbelerimen bólisedi. Óńirdiń bıznes ókilderi men medıtsına qyzmetkerleri úshin sheberlik sabaqtar ótkizý de josparlanǵan.

Aıta keteıik, bıyl Medortalyqtyń beldi mamandarynan quralǵan aýqymdy delegatsııa Aqtóbe, Aqmola, Atyraý, Shyǵys Qazaqstan oblystary men Shymkent qalasyna bardy. Jyl sońyna deıin elimizdiń barlyq óńiri qamtylady dep josparlanǵan.