QR Prezıdenti: Halqymyz qashanda bereke-birlikke, yrys-yntymaqqa basa mán bergen
Memleket basshysy óz sózinde saltanatty jıynǵa qatysýshylardy Ulystyń uly kúnimen quttyqtap, bul meıramnyń tarıhy tereń tól merekemiz ekenin atap ótti.
– Áz Naýryz tabıǵatty túletip, tirshilikke nár beredi, jańarý men jańǵyrýǵa úndeıdi. Men kúni keshe ǵana halyqqa Joldaýymdy jarııalap, Jańa Qazaqstandy qurýǵa jol ashatyn mańyzdy bastamalar usyndym. Munyń bári – elimizde júzege asyrylyp jatqan saıası reformalardyń zańdy jalǵasy. Bizdiń maqsatymyz – tıimdi memleket jáne ádil qoǵam qurý. Sondaı-aq halqymyzdyń ál-aýqatyn arttyryp, turmys sapasyn jaqsartý. Eń bastysy, qasterli Táýelsizdigimizdi qorǵap, Qazaqstandy myqty memleketke aınaldyrý, – dedi Prezıdent.
Memleket basshysy qoǵamnyń barlyq salasynda túbegeıli ózgeris jasaýǵa kirise otyryp, elimizdi damytýdyń múlde jańa kezeńine qadam basatynymyzǵa nazar aýdardy. Onyń pikirinshe, Jańa Qazaqstan – abstrakty ıdeıa emes, keleshektiń jarqyn kórinisi.
– Sizderdiń árqaısylaryńyz yntymaq pen birlik qundylyqtaryna adaldyǵyn is júzinde dáleldegen naǵyz patrıotsyzdar. Ózderińizdiń qajyrly eńbekterińizben, kómek qolyn sozýǵa degen shynaıy nıetterińizben barsha otandasymyzǵa úlgi-ónege kórsetesizder. Biz Qazaqstandy reformalaý úderisin bastadyq. Jańa múmkindikter men damýǵa umtylǵan Jańa Qazaqstandy birge quramyz, – dedi Qasym-Jomart Toqaev.
Prezıdent Joldaýdaǵy árbir bastamany osy maqsatqa jetý jolyndaǵy naqty qadam dep sanaıdy. Ony tabysty júzege asyrý – barshamyzdyń ortaq mindetimiz.
– Qazir aýmaly-tókpeli kezeń bolyp tur. Geosaıası ahýal kúnnen kúnge ýshyǵa túsýde. Onyń salqyny belgili sebepterge baılanysty Qazaqstanǵa da tıedi. Biraq, biz baǵdarymyzdan aınymaı, kózdegen maqsatymyzǵa qalaıda jetemiz. Sol úshin bir jaǵadan bas, bir jeńnen qol shyǵaryp, jumyla jumys isteýimiz kerek, – dedi Memleket basshysy.
Qasym-Jomart Toqaevtyń aıtýynsha, búginde árbir otandasymyz egemen elimizdi órkendetýge óz úlesin qosýda. Halqymyz qashanda bereke-birlikke, yrys-yntymaqqa basa mán bergen, ózara janashyrlyq pen qamqorlyqty barynsha dáriptegen.
– El ishinde beıbit kúnde eńbegimen, qıyn sátte erligimen kózge túsken jandar az emes. Keshegi dúrbeleń kezinde qanshama azamatymyz jurtty sabyrǵa shaqyryp, salıqaly sóz aıtty. Olar óz basyn qaterge tigip, aınalasyndaǵy adamdarǵa kómektesti. Jaýapty sátte jurtyna qorǵan bolyp, eldiktiń naǵyz úlgisin kórsetti. Osyndaı otanshyl tulǵalarymyz – jas urpaqqa ónege. Halqymyz «Er – eńbegimen qadirli» dep beker aıtpaǵan. Elge eńbegi sińgen jandarǵa Ulystyń uly kúninde qurmet kórsetýdiń zor sımvoldyq máni bar, – dedi Prezıdent.
Qasym-Jomart Toqaev sózin qorytyndylaı kele, Naýryz merekesi qarsańynda bir top qaıratkerge memlekettik nagrada tapsyrý jóninde sheshim qabyldaǵanyn jetkizdi. Sondaı-aq bul is-sharany osy meıramǵa oraı ótkizý ıgi dástúrge aınalatynyn aıtty.