QR Prezıdenti eldegi jaǵdaıǵa qatysty batyl sheshim qabyldady - Darhan Myńbaı
Memleket basshysynyń Qazaqstan halqyna joldaǵan Úndeýine qatysty pikir bildirgen QR Parlamenti Májilisiniń depýtaty Darhan Myńbaı osylaı dedi, dep habarlaıdy QazAqparat tilshisi.
«Memleket basshysy eldegi jaǵdaıǵa qatysty Konstıtýtsııa men óz quzyretine saı batyl sheshim qabyldady. Endigi ýaqytta Prezıdent belgilep bergen mindetti árbir jaýapty memlekettik organ, ár basshy men halyq óz deńgeıinde oryndaı bilse. Sonda ǵana elimizdi qalpyna jumystary keltirý tezirek júzege asady. Búgin Memleket basshysy qabyldaǵan sheshim árbir qazaqstandyqqa qatysty, sondyqtan azamattarymyzdy jaýapkershilik pen el birligi úshin uıymshyl bolýǵa shaqyramyn», - dedi Darhan Myńbaı.
Halyq qalaýlysynyń aıtýynsha, zań barshaǵa ortaq jáne ony azamattardyń saqtaǵany abzal.
«Halyqtyń sanasy joǵary, kózi ashyq. Azamattardyń óz oıy men talabyn bılikke jetkizgeni durys. Biraq, bári zań aıasynda júzege asýy tıis. Beıbit tolqýǵa shyqqan árbir azamat jeke jaýapkershilik týraly umytpaý kerek. Qazir arandatýshylyq týraly kóp áńgime aıtylyp jatyr, sondyqtan da ár adam óz is-áreketine jaýappen qarasa dep otyrmyn. Azamattyq pozıtsııa kerek, biraq jol-jónekeı aıtaqqa ermegen jón. Memleket basshysy aıtqandaı, eldegi bassyzdyq kezinde asa qatygezdik baıqaldy. Qan tógildi. Bul qylmys jáne sanaǵa syımaıdy», - deıdi ol.