QR Prezıdenti: Ekonomıkalyq yntymaqtastyqty keńeıtý - AÓSShK qyzmetiniń negizgi baǵyty

ShANHAI. QazAqparat - Azııadaǵy ózara is-qımyl jáne senim sharalary keńesi (AÓSShK) qyzmetiniń negizgi baǵyty - oǵan múshe memleketter arasyndaǵy ekonomıkalyq yntymaqtastyqty keńeıtý. Bul týraly AÓSShK birinshi plenarlyq otyrysy barysynda Qazaqstan Prezıdenti N. Nazarbaev málimdedi.

«Ekonomıkalyq yntymaqtastyqty keńeıtý - AÓSShK qyzmetiniń negizgi baǵyttarynyń biri. Búginde Azııa - álemdik ekonomıkanyń lokomotıvi. Ekonomıka boıynsha úzdik 20 eldiń qatarynda alty Azııa eli bar. AÓSShK memleketteriniń úlesi álemdik ІJÓ-niń úshten bir bóligin quraıdy. Bizdiń aımaqtyń ekonomıkalyq damýyn kóbine jahandyq trendter anyqtaıdy», - dedi Nursultan Nazarbaev.

Onyń sózine qaraǵanda, qazirgi G-8, G-20 formattary men ózge de uıymdar álemdik ekonomıkalyq daǵdarystyń saldaryn joıý boıynsha tıimdi sharalardy jasap shyǵara almady. «Sondyqtan men 2012 jyly «G-GLOBAL» bastamasyn kóterdim. Bul platformaǵa 21-shi ǵasyrdaǵy eń irgeli prıntsıpter engen, oǵan ınteraktıvti túrde 150-den astam el qatysýda», - dep atap ótti N.Nazarbaev. Ol, sonymen qatar, azyq-túlik qaýipsizdigin qamtamasyz etý qazirgi tańda eń ózekti máselerdiń biri bolyp otyrǵanyn atap ótti. «Búgingi tańda ashtyqqa tap bolǵan halyqtyń 60 paıyzy Azııa elderinde. Osy máseleni sheshý úshin óńirdiń barlyq memleketteriniń keshendi túrde birigýi qajet, sonymen birge, AÓІSShK jelisi boıynsha azyq-túlik óndirisine qatysty naqty mehanızmderdi ázirleý qajet», - dedi ol. Agrarlyq sektor úshin, ózge de salalar úshin de qoljetimdi, tarmaqty kólik kommýnıkatsııasyn qurý mańyzdy ról atqarady dep jalǵastyrdy N. Nazarbaev. Uly jibek jolyn qaıta jańǵyrtý buǵan jaqsy negiz bolady. «Bul turǵyda QHR Tóraǵasy Sı Tszınpınniń Jibek joly ınfraqurylymdyq qoryn qurý ıdeıasynyń máni zor. Azııa men Eýropa elderin biriktiretin baǵdar álemdegi eń iri kólik júıesine aınalmaq. Kelesi jyly Qazaqstan Azııadan Eýropaǵa taýarlardy jetkizý merzimin 2 esege qysqartatyn «Batys Eýropa-Batys Qytaı» avtomagıstralin iske qosady. Oǵan qosa, biz kórshiles eldermen Lıanıýngan porty arqyly Qytaı men Ońtústik shyǵys Azııaǵa shyǵatyn jańa temirjol magıstraldaryn salyp jatyrmyz, Iran men Parsy shyǵanaǵy elderine shyǵatyn temirjol qurylystaryn aıaqtap qaldyq. Álemdik ekonomıkanyń ósýi aıasynda zamanaýı tehnologııalar men energetıkalyq resýrstarǵa qoljetimdilikti qamtasyz etý ózektiligi de artyp keledi. .