QR Prezıdenti EAEO ortaq valıýtasy jaıynda: Onyń aýyly alysta

ASTANA. QazAqparat - Jyl qorytyndysy boıynsha BAQ ókilderine suhbat bergen Elbasy Nursultan Nazarbaev Eýrazııalyq ekonomıkalyq odaqtyń ortaq valıýtasy jaıyndaǵy máselege sońǵy núkte qoıdy, dep habarlaıdy QazAqparat tilshisi.

QR Prezıdenti kelesi jyly EAEO týraly ıdeıanyń 25 jyldyǵy jáne EAEO týraly sharttyń 5 jyldyǵy bolatyndyǵyn atap ótti.

«Sankt-Peterbordaǵy kezdesý barysynda biz eki mereıtoıdy da, 25 jyldyqty da, 5 jyldyqty da  osy jerde kelesi jyldyń shildesinde atap ótýge kelistik. Biryńǵaı valıýtaǵa keler bolsam, bul taqyrypta eshkim de baıypty sóz qozǵaǵan emes jáne biz eshqandaı da kelissózder júrgizgen emespiz», - dedi Nursultan Nazarbaev.

Memleket basshysy bireýlerdiń eýro sııaqty ortaq valıýtany qalaıtyndyǵyn, biraq, ol úshin odaqqa múshe memleketterdiń ekonomıkasy bir deńgeıde bolýy kerektigin basa aıtty.

«Bizge munyń aýyly áli alysta.Tipti, energetıkany Reseımen, Qytaımen ulttyq valıýtada saýdalaý máselesiniń ózi qıyndyq týdyrady. Sondyqtan, bul óte alystaǵy keleshektiń enshisinde. Onyń ózi de qıyn másele. Nıet jaqsy, biraq jaqynarada muny oryn ala qoıady dep oılamaımyn», - dedi QR Prezıdenti.