QR Prezıdenti EAEO-nyń ózge halyqaralyq uıymdarmen áriptestigin nyǵaıtýǵa shaqyrdy

ASTANA. QazAqparat – Prezıdent Qasym-Jomart Toqaev Joǵary Eýrazııalyq ekonomıkalyq keńestiń keńeıtilgen quramdaǵy otyrysynda eýrazııalyq ıntegratsııanyń alǵashqy 10 jyldyǵy týraly baıandama ázirleýdi usyndy, dep habarlaıdy QazAqparat tilshisi.

«Kelesi jyly bizdiń birlestikke 10 jyl tolady. Biz EAEO-nyń mereıtoıly sammıtine jınalamyz. Bul mańyzdy oqıǵa júrip ótken jolmyzdy egjeı-tegjeıli taldap, odaqtyń ári qaraıǵy strategııalyq keleshegin anyqtaýǵa jaqsy sebep bolýy kerek dep esepteımin», - dedi Qasym-Jomart Toqaev.

Sondaı-aq, Prezıdent eýrazııalyq ıntegratsııanyń alǵashqy 10 jyldyq qorytyndylaryn qujatpen qattaýdy usyndy.

«Osyǵan baılanysty komıssııaǵa Joǵary keńestiń kelesi otyrysyna eýrazııalyq ıntegratsııanyń birinshi kezeńi týraly baıandama daıyndaýdy tapsyrýdy usynamyn. Onda negizgi qorytyndylar men jetistikter, sondaı-aq ári qaraıǵy ıntegratsııalyq damý baǵytyndaǵy naqty usynystar kórsetilýi kerek», - dedi Memleket basshysy.

Keńeıtilgen keńestiń otyrysyna Qazaqstan Prezıdentimen qatar Reseı Federatsııasynyń Prezıdenti – JEEK tóraǵasy Vladımır Pýtın, Armenııa Premer-mınıstri Nıkol Pashınıan, Belarýs Prezıdenti Aleksandr Lýkashenko, Qyrǵyzstan Prezıdenti Sadyr Japarov, sondaı-aq Ázerbaıjan Prezıdenti Ilham Álıev qatysatyny habarlanǵan bolatyn.