QR Prezıdenti: EAEO-ny ózara tıimdi yntymaqtastyq prıntsıpinde damytý qajet

NUR-SULTAN. QazAqparat - Eýrazııalyq ekonomıkalyq odaqty ózara tıimdi yntymaqtastyq prıntsıpinde damytý qajet. Bul týraly búgin elordada ótken Joǵary Eýrazııa ekonomıkalyq keńesiniń keńeıtilgen quramdaǵy otyrysynda Qazaqstan Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Mańyzdy mindet - bizdiń ıntegratsııalyq jobanyń tartymdylyǵyn qamtamasyz etý. Biz bir-biriniń pikirin eskere jáne sheshimderdi barynsha kelise otyryp, ózara tıimdi yntymaqtastyq prıntsıpimen Odaqty damytýǵa tıispiz. Bizdiń ıntegratsııalyq birlestiktiń álemdik qoǵamdastyq aldynda bedeliniń túsýinen qorǵaýymyz qajet», - dedi Qasym-Jomart Toqaev.

Memleket basshysy Odaqqa múshe memleketter, olardyń ekonomıkasy, bıznesi, azamattary Odaqqa músheliktiń shynaıy jemisin sezinýi tıis ekendigin aıtty.

«Basqasha sózben aıtar bolsa, bizdiń ózara is-qımylymyz shyn máninde osynaý ıntegratsııalyq jobanyń qatysýshysy bolyp sanalmaıtyn eldermen yntymaqtastyq sharttaryna qaraǵanda barynsha tartymdy bolýy tıis», - dedi QR Prezıdenti.

Aıta keteıik, keńestiń keńeıtilgen quramdaǵy otyrysyna Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev, Qyrǵyz Respýblıkasynyń Prezıdenti Sooronbaı Jeenbekov, Belarýs Respýblıkasynyń Prezıdenti Aleksandr Lýkashenko, Reseı Prezıdenti Vladımır Pýtın, Armenııa Respýblıkasynyń Premer-mınıstri Nıkol Pashınıan, sonmen qatar Moldova Respýblıkasynyń Prezıdenti Igor Dodon EAEO janyndaǵy baqylaýshy memlekettiń basshysy retinde, Tájikstan Respýblıkasynyń Prezıdenti Emomalı Rahmon qurmetti qonaq retinde qatysty.