QR Prezıdenti: Bizge jańa formatsııanyń polıtseıleri kerek

ASTANA. QazAqparat - Qazaqstan Prezıdenti Nursultan Nazarbaev polıtsııa qyzmetiniń jańa formatsııasyn qurý qajettigin málim etti, dep habarlaıdy QazAqparat Aqordanyń baspasóz qyzmetine silteme jasap.

«Barlyq artyq tustardan arylyp, qylmyspen kúreske jáne quqyqtyq tártipke jumylý kerek. Bólimder ońtaılandyrylyp, sonyń arqasynda bir adamnyń jetekshiliginde úsh adamnan emes, bes adamnan aınalatyn bolady. Shtattyq san 10 paıyzǵa qysqarady. Atalmysh sharalar 100 myń adamǵa shaqqanda polıtseılerdi 471-den 424-ke azaıtady. Bul eýropalyq deńgeımen teńdes ekenin aıta ketý kerek. Osynyń arqasynda 16 mıllıard teńge únemdeledi», - dedi Memleket basshysy ishki ister organdarynyń jumysyn jańǵyrtý máseleleri boıynsha ótken otyrysta.

Prezıdent jańǵyrtýdyń mańyzdylyǵyna toqtalyp, keıbir qurylymdardy ońtaılandyrý jáne polıtsııanyń qyzmetine saı kelmeıtin qyzmetterdi qysqartý máselesine nazar aýdardy. Qazaqstan Prezıdenti osydan únemdelgen qarajatty qyzmetkerlerdiń eńbekaqy júıesin jaqsartý jáne áleýmettik qorǵalýyna baǵyttaý kerektigin tapsyrdy. Prezıdent sonymen birge qosymsha ishki rezervterdi izdeý boıynsha júıeli jumys júrgizýge jáne tıimsiz ákimshilik shyǵystardy qysqartý qajettigine toqtaldy.

«Polıtseılerdiń eńbekaqysyn arttyrýǵa qosymsha 21,4 mlrd teńge jumsalady. Onyń bári de - halyqtyń aqshasy. Salyq tóleýshilerdiń qarajaty esebinen biz polıtsııany, armııa men sottardy ustap otyrmyz. Mine, sondyqtan azamattar quqyqqorǵaý organdarynyń qyzmetkerleri óz mindetin laıyqty atqarýyn talap etedi», - dedi Memleket basshysy.

Nursultan Nazarbaev sonymen qatar qylmyspen kúresip, quqyqtyq tártipti qadaǵalap júrgen qyzmetkerlerdiń turǵyn úı máselesin sheshý jumysyna jeke toqtaldy. Prezıdenttiń aıtýyna qaraǵanda, bul sharalar qosymsha bilikti kadrlardy tartýǵa múmkindik berip, bólimshelerdi kúsheıtýge jol ashady. Memleket basshysy óz sózinde polıtsııa sapynan qyzmetker ketip qalǵan jaǵdaıda oǵan berilgen barlyq jeńildikter alynyp tastalatynyn habarlady.

«Bizge jańa formatsııanyń polıtseıleri kerek. Kadrlardy irikteý, daıarlaý jáne alǵa jyljytýdyń júıesi qaıta qaralatyn bolady. Vedomstvolyq bilimge úlken ózgerister engiziledi. Daıarlyq sapasy álemdik standarttarǵa saı keletin zamanǵa laıyq polıtsııa akademııalary kerek», - dedi Elbasy.

Eske sala ketsek, Memleket basshysy sondaı-aq polıtsııany reformalaýǵa kidirmesten kirisý qajettigin atap ótken bolatyn.