QR Prezıdenti: Aýǵanstandaǵy ahýal aldymyzǵa jańa mindetter qoıyp otyr

NUR-SULTAN. QazAqparat – Memleket basshysy elimizdiń qorǵanys ónerkásibi kesheni men qaýqaryn qaıta qarap, memlekettik jospar ázirleýdi tapsyrdy, dep habarlaıdy QazAqparat tilshisi.

«Aýǵanstandaǵy ahýalǵa baılanysty jahandyq jaǵdaı shıelenise tústi. Bul bizdiń aldymyzǵa jańa mindetter qoıyp otyr. Biz qorǵanys ónerkásibi keshenini qyzmetin qaıta qaraýymyz kerek. Memleketimizdiń qorǵanys qaýqaryn kúsheıte túsý men jańa qaýipke jyldam áreket etý memlekettiń basym baǵyttarynyń biri. Bastysy syrttan tónýi múmkin degen qaýiptiń aldyn alý kerek. Sol úshin de stsenarıı ázirlep, ony synaqtan ótkizý qajet. Sonyń negizinde memlekettik apparattyń is-áreket jospary daıyndalady», - dedi Qasym-Jomart Toqaev Joldaýynda.

Buǵan deıin Memleket basshysy elimizdiń bıologııalyq qaýipsizdigimen aınalysatyn ulttyq júıe qurý týraly aıtqan edi.

«Elimizdiń bıologııalyq qaýipsizdigin boljaýmen aınalysatyn ulttyq júıe qurylýǵa tıis. Bul is-shara tıisti zań jobaynda qarastyrylǵan. Parlamentten osy zań jobasyn qazirgi sessııanyń sońyna deıin qabyldaýdy suraımyn. Medıtsınalyq saraptama jasaıtyn kóptegen zerthanamyz halyqaralyq standartqa saı emes. Densaýlyq ulttyq jobasy boıynsha keminde 12 zerthanany joǵary tehnologııalyq quralmen jabdyqtaý qajet. Sonyń arqasynda zerthanalarymyz 90 paıyzǵa deıin halyqaralyq talapqa saı jumys isteıtin bolady», - dedi Prezıdent.