QR Prezıdenti: Armenııadan mashına ákelýdegi alaıaqtyq faktiler boıynsha tergeý júrgizilýde

NUR-SULTAN. QazAqparat - Armenııadan mashına ákelý barysyndaǵy alaıaqtyq áreket faktileri boıynsha tergeý júrgizilip jatyr. Bul jaıynda Qazaqstan Prezıdenti Qasym-Jomart Toqaev informburo.kz aqparattyq-saraptamalyq portalyna bergen eksklıýzıvti suhbatynda aıtty, dep habarlaıdy QazAqparat tilshisi.

«Problema áli kúnge deıin ózekti bolyp turǵanymen kelisemin. Adam jolyn taýyp, kórshi elderden avtomobıldi kóptep alyp keldi. Meniń tapsyrmammen Bas prokýratýra osy ahýalǵa quqyqtyq baǵalaý júrgizdi. Birqatar memlekettik qurylymnyń qyzmetine narazylyq bar. Buǵan qosa, jekelegen tulǵalar zańnamany buza otyryp jáne adamdardy aldap, munan zańsyz bıznes quryp alǵan. Armenııadan mashına ákelý barysyndaǵy alaıaqtyq áreket faktileri boıynsha tergeý júrgizilip jatyr», - dedi Memleket basshysy.

QR Prezıdentiniń atap ótýinshe, EAEO boıynsha Qazaqstannyń keıbir seriktesterimen ózara is-qımylda da birqatar másele bar. Qazirgi ýaqytta olarmen aldaǵy ýaqytta mundaı problemalardyń qaıtalanýyna jol bermeý úshin jumys júrgizilip jatyr.

«Úkimetke qazaqstandyq kólik ıeleriniń múddelerin eskere otyryp, Armenııadan ákelingen avtomashınalardy paıdalanýdy retke keltirý boıynsha qosymsha uıymdastyrýshylyq sharalardy ázirleý tapsyryldy», - dedi Qasym-Jomart Toqaev.