QR Prezıdenti: Árbir basshy mansap jolyn tómennen bastaýy tıis

ASTANA. QazAqparat - Árbir basshy mansap jolyn tómennen bastaýy tıis. Bul týraly búgin Astanadaǵy Táýelsizdik saraıynda ótip jatqan «Nur Otan» partııasynyń kezekti XVI sezinde Memleket basshysy, partııa kóshbasshysy Nursultan Nazarbaev aıtty.

«Árbir basshy tómennen bastap, barlyq basqarý deńgeıinen ótýi tıis dep aıtyp kelemin. Keńes úkimeti kezinde bári jaman boldy dep aıtýǵa bolmaıdy. Bir basshyny shyǵarý úshin aldymen ol aýylda basshy bolyp jumys isteýi tıis edi. Sodan keıin aýdanda, aýdannan qalaǵa, qaladan oblystyq basshylyq deńgeıdegi qyzmetke kelýi tıis edi. Odan keıin bastyq bolýshy edi. Qazir saıtandaı sap etip, bastyq, mıınstr bolyp shyǵa keledi», - dedi Elbasy.

QR Prezıdenti óziniń basqarýshylyq qyzmetiniń barlyq satysynan ótkendigin de sezd qatysýshylarynyń qaperine salyp ótti.

«Men munyń barlyǵyn óte jaqsy túsinemin. Óıtkeni, men munyń barlyǵynan ótken bolatynmyn. Mine, memlekettik qyzmet dál osyndaı bolýy tıis», - dedi QR Prezıdenti.