QR Prezıdenti aqyn Kúlásh Ahmetovany 75 jyldyq mereıtoıymen quttyqtady
Kúlásh Ahmetovany arnaıy quttyqtap barǵan Jambyl oblysynyń ákimi Berdibek Saparbaev belgili qalamgerge QR Prezıdenti Qasym-Jomart Toqaevtyń quttyqtaý hatyn jetkizip, oqyp berdi. Memleket basshysy Kúlásh Ahmetovanyń óleńderiniń ómirsheńdigin atap ótken. Onyń shyǵarmashylyǵyndaǵy lırıkalyq obrazdar jarqyn ári naq sýrettelip, dúnıedegi qubylystar aqyn kózqarasymen oqyrmandaryn eriksiz baýraıtyndyǵy aıtylǵan. Óz quttyqtaýynda Memleket basshysy Kúlásh Ahmetovaǵa zor densaýlyq jáne shyǵarmashylyq tabys tilegen.
Berdibek Saparbaev aqyndy mereıtoıymen quttyqtap, gúl shoǵyn tabys etti.
«Sizdiń óleńderińizdi birneshe jas býyn urpaq súıip oqyp, ósti. Shyǵarmashylyǵyńyzdyń negizi adal dostyq pen mahabbat, jomarttyq pen patrıotızm desek, sol arqyly jas urpaqty durys jolǵa tárbıeleýge úles qosyp kelesiz. Sizdiń parasatty poezııańyz arqyly qalyń oqyrman oı túıip, jaqsylyqqa umtylyp, boıyń túzeıdi», - dep atap ótti óńir basshysy.
Kúlásh Ahmetova QR Memlekettik syılyǵynyń laýreaty, Jambyl oblysynyń Qurmetti azamaty, «Qurmet» ordeniniń ıegeri. Aqynnyń shyǵarmalary álemniń kóptegen tilderine aýdarylǵan.
Qarapaıym otbasynda dúnıege kelgen K: Ahmetovanyń ómir joly ońaı bolmady. Onyń erekshe talanty balalyq shaǵynda baıqalyp, 14 jasynda-aq júrekjardy balaýsa jyr joldaryn qaǵaz betine túsire bastady. Búginde aqynnyń názik lırıkalyq jáne patrıottyq taqyryptaǵy otty óleńderi oıly oqyrmandarynyń júrek tórinen oryn alyp keledi. Tulǵanyń Qazaq dalasyndaǵy Sóz ben Ánniń uly róli týraly oılary halyqtyq ańyz-áńgimelermen ushtasady. Kúlásh Ahmetova «Aq gúlim meniń», «Sen meniń baqytymsyń», «Bulaqtaǵy juldyzdar», «Meıirim», «Japyraq - jazdyń júregi» jáne taǵy da basqa birqatar kitaptardyń avtory. Ol keńestik kezeńde Qazaqstan Jastar Odaǵy syılyǵynyń laýreaty atanǵan sanaýly mádenıet qaıratkerleriniń biri. Kúlásh Ahmetova qolynan qalamyn tastamaı, búginde óz shyǵarmalarynda patrıottyq tárbıege, týǵan jerge degen súıispenshilikke aıryqsha basymdyq berip keledi.
Mereıtoıy qarsańynda Kúlásh Ahmetovanyń jańa bes tomdyq shyǵarmalar jınaǵy jaryq kórip, oqyrmanǵa jol tartty. Karantındik shekteýlerge baılanysty mereıtoılyq negizgi sharalar kúzde ótkizilmek. Soǵan oraı aqynnyń Otanǵa arnalǵan jańa kitaby jaryq kóredi dep kútilýde. Oǵan Qazaqstannyń ár aımaǵyndaǵy tabıǵattyń sulý kórinisteri sýrettelgen óleńder toptamasy enedi.