QR Prezıdenti Ákimshiliginiń memlekettik ınspektory Maqtaaral aýdanynda boldy

MAQTAARAL. QazAqparat – Túrkistan oblysy, Maqtaaral aýdanyna Qazaqstan Respýblıkasy Prezıdent Ákimshiliginiń memlekettik ınspektory Serik Qojanııazov jumys saparymen keldi.

Sapar barysynda ol ótken jyly ǵana jańadan qurylǵan aýdannyń tynys-tirshiligimen tanysyp, jergilikti halyqpen kezdesti, dep habarlaıdy QazAqparat tilshisi.

Memlekettik ınspektor eń aldymen Maqtaaral aýyldyq okrýgi, Órkenıet eldi mekenindegi «Álibı» sharýa qojalyǵyndaǵy maqta terim naýqanynyń kýási boldy. Berik Shampıevtiń basshylyǵyndaǵy qojalyqtyń enshisinde 45 gektar jer bar. Búginde munda 15 adam jumyspen qamtylǵan. Sondaı-aq, kombaın arqyly aq altyndy jınaý naýqany júrip jatyr.

Munan soń S.Qojanııazov Jańajol aýyldyq okrýgine qarasty Ferdaýsı eldi mekenindegi 600 oryndyq mekteptiń jumysymen tanysty. Ótken oqý jylynda paıdalanýǵa berilgen bilim uıasynyń qurylysyna bıýdjetten 1 mıllıard teńgeden asa qarjy jumsalǵan. Mekteptiń ishin aralaǵan memlekettik ınspektor ǵımarattyń zamanaýı qural-jabdyqtarmen, ınfraqurylymdarmen qamtylǵanyna kýá boldy.

Mýltımedııalyq kabınetterdi, zerthanalar, mamandandyrylǵan oqý synyptaryn, sheberhanalar men kitaphanalardy, ádistemelik, dárigerlik, psıhologııalyq kabınetterdi, sport zalyn kórip, qurylys sapasyna oń baǵa berdi. Memlekettik ınspektordyń kelesi aıaldaǵan jeri Myrzakent kentindegi «Myrzakent» maqta óńdeý zaýyty boldy.

Ermahan Jabýovtyń basshylyǵyndaǵy óndiris oshaǵynyń jalpy quny 1 mıllıard teńgeni quraıdy. Maqta shıkizatyn talshyqqa, shıtke, lıntke jáne ýlıýgke bólip shyǵaratyn zaýyttyń jyldyq qýaty 60 myń tonnaǵa deıin jetedi. Qazirgi tańda munda 250 adam jumyspen qamtylǵan.

Aýdan ákimi Baqyt Asanov S.Qojanııazovty aýdandy damytý maqsatynda iske asyrylyp jatqan birneshe jobalarmen tanystyrdy.

Atap aıtqanda, qurylys salasy boıynsha 4 joba, abattandyrý salasy boıynsha 22 joba, jol salasy boıynsha 2 joba, kommýnaldyq sala boıynsha 9 joba, barlyǵy 37 joba iske asyrylmaqshy. Qazirgi tańda aýdan ortalyǵy Myrzakent kentinde abattandyrý, jaryqtandyrý, trotýarlar salý jumystary qarqyn alǵan. Kenttiń kireberisterine jańa qaqpalar ornatylýda. Sondaı-aq, aýdan ortalyǵynyń ortalyq alańyn zaman talabyna saı kórikti etip jasaý úshin qurylys jumystary júrgizilýde.

Aıta keteıik, aýdandaǵy atqarylyp jatqan jumystar men jobalarǵa oń baǵasyn bergen memlekettik ınspektor «Myrzakent» aýdandyq aýrýhanasynyń jáne Dostyq eldi mekenindegi 600 oryndyq Ǵ.Músirepov atyndaǵy №53 jalpy orta mektebiniń jumys barysymen de tanysty.