QR Prezıdenti Ákimshiliginiń front-keńsesi azamattardy qabyldaýyn toqtatty
11:53, 15 Naýryz 2020
NUR-SULTAN. QazAqparat - QR Prezıdenti Ákimshiliginiń front-keńsesi azamattardy qabyldaýyn ýaqytsha toqtatty. Mundaı aqparat QR Prezıdenti Ákimshiligi qoǵamdyq qabyldaýynyń Telegram-daǵy paraqshasynda jarııalandy, dep habarlaıdy QazAqparat tilshisi.
«Koronavırýstyń taralý qaýpin tómendetý boıynsha aldyn ala sharalar qabyldaý maqsatynda Prezıdent Ákimshiliginiń front-keńsesi 2020 jyldyń 16 naýryzynan azamattardy qabyldaýdy ýaqytsha toqtatatyndyǵyn habarlaıdy. Erterek jazylyp qoıǵan azamattar kezekterin saqtaıdy jáne qabyldaý qaıta bastalǵannan keıin jańa keste týraly qosymsha habarlanady», - delingen taratylǵan aqparatta.
Sonymen qatar atalǵan habarlamada shaǵymdardy Prezıdenttiń vırtýaldy qabyldaý portaly, «e-gov» elektrondy úkimeti jáne «Qazposhta» AQ qyzmetteri arqyly berý múmkindigi saqtalatyndyǵyn eskertilgen.