QR Prezıdenti: Abaı óz zamanyndaǵy iskerliktiń uıytqysy, eńbekqorlyqtyń motıvatory
Bul týraly Memleket basshysy Qasym-Jomart Toqaevtyń «Abaı jáne HHІ ǵasyrdaǵy Qazaqstan» atty maqalasynda aıtylǵan.
Avtor onda Abaı shyǵarmashylyǵyna arqaý bolǵan taqyryptyń biri – masyldyqpen kúres ekenin aıtady.
«Aqyn únemi ýaıymsyz salǵyrttyqqa, oıyn-kúlkige salynbaı, sergek bolýǵa úndeıdi. Ony udaıy eńbek arqyly shyńdap otyrýdy qup kóredi. Sonymen qatar, oryndy árekettiń ýaıym-qaıǵyny jeńetinin dáleldep, masyldyqpen kúrestiń psıhologııalyq qyrlaryna tereń boılaıdy. Qazir biz kóp aıtyp júrgen emotsıonaldy ıntellektige de sol tusta nazar aýdardy. Maqtan men masyldyq psıhologııadan arylyp, qaırattanyp eńbek etýdi, talaptanyp bilim izdeýdi nasıhattaǵan»,-dep jazady Memleket basshysy.
Sondaı-aq Prezıdenttiń jazýynsha, Abaı óleńderindegi «Eńbek etseń erinbeı, Toıady qarnyń tilenbeı», «Tamaǵy toqtyq, Jumysy joqtyq, Azdyrar adam balasyn», «Ózińe sen, ózińdi alyp shyǵar, Eńbegiń men aqylyń eki jaqtap» – degen qazynaly oılar bárimizge jaqsy tanys. Ár adam osy túıindi tujyrymdardy sanasyna berik toqyp, óziniń tynymsyz, adal eńbegimen aınalasyna úlgi bolýy kerek.
«Halqymyz eńbektiń qadirin biledi. Biz ata-analarymyzdyń tyldaǵy aýyr eńbegi jeńiske jetelegen orasan kúshke aınalǵanyn umytqan joqpyz. Qazir de qarapaıym eńbek adamdarynyń úlgili isteri jeterlik. Jaqynda solardyń birazy memlekettik nagradalarmen marapattaldy. Eń bastysy, búgingideı beıbit kezeńde ár azamat óziniń eseli eńbegi elimizdiń ekonomıkasyn ilgeriletýge tikeleı yqpal etetinin túsinýi qajet»,-deıdi Qasym-Jomart Toqaev maqalasynda.
Sondaı-aq Memleket basshysynyń jazýynsha, Abaıdy óz zamanyndaǵy iskerliktiń uıytqysy, eńbekqorlyqtyń motıvatory deýge bolady. Uly oıshyl shyǵarmalarynda kásipten násip tapqandardy, sharýaqorlyqqa úırený daǵdylaryn úlgi etedi. Ol turmys sapasyn jaqsartý úshin eńbek etýdiń jańa tásilderin meńgerýge shaqyrady. Sonymen qatar aqyn bastamashyldyqty, kásiptegi adaldyqty joǵary qoıady. Mysaly, óziniń onynshy qara sózinde «Erinbeı eńbek qylsa, túńilmeı izdese, ornyn taýyp istese, kim baı bolmaıdy?», – dep tujyrym jasaıdy.
Abaıdyń oıynsha, tabys tabý úshin qolóner úırený kerek. Sebebi «mal jutaıdy, óner jutamaıdy» (otyz úshinshi qara sóz).
«Uly aqynnyń bul oılary búgingi Qazaqstan qoǵamy úshin de ózekti dep sanaımyn. Sondyqtan biz búgingi tańda shıkizatqa táýeldilik psıhologııasynan arylýdy, shaǵyn jáne orta bıznesti barynsha órkendetýdi negizgi basymdyqtyń biri retinde belgilep otyrmyz»,-delingen maqalada.
«Abaı jáne HHІ ǵasyrdaǵy Qazaqstan» atty maqala «Egemen Qazaqstan» basylymynyń búgingi sanynda jarııalandy.