Qazaqstan áskeriniń qatarynda óz isiniń naǵyz kásibı mamandary qyzmet etip júr - Prezıdent
Memleket basshysy, eń aldymen, jıynǵa qatysýshylardy aldaǵy Otan qorǵaýshylar kúnimen quttyqtap, bul otanshyldyq sezimdi oıatyp, jaýyngerlik rýhty arttyratyn mártebeli mereke ekenin aıtty. Sonymen qatar Qarýly Kúshterdi egemen elimizdiń myqty qalqany, beıbitshilik pen turaqtylyqtyń myzǵymas tiregi retinde atap ótti.
– Avıatsııalyq bazanyń ashylýy – Ulttyq ulan ǵana emes, búkil áskerimiz úshin aıtýly oqıǵa. Bul baza kúshtik qurylymdardyń áleýetin edáýir arttyrýǵa múmkindik beredi. Ushqyshtardyń shuǵyl áreket etýine jaǵdaı jasaıdy. Memleket Qarýly Kúshterdi jabdyqtap, áskerı ınfraqurylymdy damytý máselesin aıryqsha nazarda ustaıdy, – dedi Qasym-Jomart Toqaev.
Foto: Aqorda
Prezıdent elimizdiń birqatar óńirinde bolǵan alapat tasqynǵa qarsy kúreste sarbazdardyń aldyńǵy shepten tabylyp, antqa adal bolýdyń ozyq úlgisin kórsetkenine toqtaldy.
– Osy oraıda men áskerı ushqyshtardyń kásibı turǵydan bilikti jáne sheber áreketin erekshe atap ótkim keledi. Olar zardap shekken aımaqtarǵa gýmanıtarlyq júk jetkizdi. Azamattardy qaýipsiz jerge kóshirdi. Sonyń bárin minsiz atqardy. Osyndaı qıyn-qystaý kezde halyqpen birge bolǵan sarbazdarǵa zor rızashylyǵymdy bildiremin, – dedi Qasym-Jomart Toqaev.
Memleket basshysy áskerimizdiń sapynda óz isiniń naǵyz kásibı mamandary qyzmet etetinin jetkizdi
Prezıdenttiń aıtýynsha, Qazaqstannyń áskerı qyzmetshileri BUU aıasyndaǵy túrli halyqaralyq mıssııalarǵa qatysyp, bitimgerlik boryshtaryn tabysty atqaryp keledi. Bıyl olar óz mindetterin Golan jotalarynda alǵash ret derbes oryndaýǵa kiristi. Bul áskerimizdiń daıyndyq deńgeıiniń joǵary ekenin jáne elimizdiń álemdik arenadaǵy bedeliniń ósip kele jatqanyn anyq kórsetedi.
– Halqymyz erjúrek jaýyngerlerin qadir tutqan, olarǵa qurmet kórsetken. Men Ulttyq quryltaıdyń Atyraýdaǵy otyrysynda Taldyqorǵan qalasyndaǵy áskerı avıabazaǵa jerlesimiz, Keńes Odaǵynyń eki márte batyry Sergeı Lýganskııdiń atyn berý týraly tapsyrma berdim. Almatylyq dańqty ushqyshtyń ónegeli ómiri urpaqqa árdaıym úlgi bolýy kerek. Mundaı bastama ulttyq áskerimizdiń bedelin arttyra túsetini sózsiz. El úshin jasalǵan erlik eshqashan umytylmaıdy, – dedi Memleket basshysy.
Prezıdent áskerı qyzmetshilerdiń erjúrek batyrlar men dańqty babalardyń jolyn abyroımen jalǵastyryp kele jatqanyn aıtyp, olardyń Otan aldyndaǵy qyzmetterine tabys tiledi.
Shara barysynda Memleket basshysyna Qarýly Kúshterdiń, basqa da áskerı quramalardyń ushaqtary men tikushaqtarynyń, jaýyngerlik jáne arnaýly tehnıkalarynyń jańa úlgileri tanystyryldy.
Sonymen qatar Qasym-Jomart Toqaev avıabazadaǵy birqatar ınfraqurylymdyq nysandy aralap kórdi. Іshki ister mınıstriniń orynbasary – Ulttyq ulannyń Bas qolbasshysy Erkin Botaqanov jaýyngerlik tapsyrmalardy óz deńgeıinde oryndaý úshin bazada barlyq jaǵdaı jasalǵanyn málimdedi.
Sodan keıin Prezıdent áskerı qalashyqtyń Dańq zalyna baryp, Qurmetti qonaqtar kitabyna qoltańba qaldyrdy.
Avıabazanyń Astana áýe aılaǵynda ornalasýy jeke quram men tehnıkany qajet jerine ýaqytyly jetkizýge múmkindik beredi. Sondaı-aq áýeden barlaý júrgizý, zardap shekkenderdi evakýatsııalaý kezinde Ulttyq ulannyń bólimshelerine avıatsııalyq qoldaý kórsetedi.