QR Prezıdenti TRK jáne CMG Qazaqstan men Qytaı kóshbasshylarynyń qatysýymen memorandýmǵa qol qoıdy

<p>ASTANA. KAZINFORM &ndash; Búgin Astanada Qytaı Halyq Respýblıkasynyń Tóraǵasy Sı Tszınpınniń Qazaqstan Respýblıkasyna memlekettik sapary aıasynda QR Prezıdentiniń Teleradıokesheni men Qytaı Medıakorporatsııasy (CMG) yntymaqtastyq jáne ózara túsinistik týraly memorandýmǵa qol qoıdy.</p>

Qol qoıý rásimi Aqordada Qazaqstan Prezıdenti Q.K. Toqaev pen Qytaı Tóraǵasy Sı Tszınpınniń qatysýymen ótti. Qujatqa Prezıdent Teleradıokesheniniń dırektory Raýshan Qajybaeva men Qytaı Medıakorporatsııasynyń prezıdenti Shen Haısıýn qol qoıdy.

«Búgin qol qoıylǵan memorandým eki eldiń ómirindegi mańyzdy oqıǵalardy jarııalaýda medıa-kontentpen almasýdy jáne ózara qoldaýdy kózdeıdi», - dep atap ótti Raýshan Qajybaeva.

Buǵan deıin taraptar «Silk Way» jáne CGTN telearnalary arasynda alǵashqy birlesken «Astana-Beıjiń» telekópirin ótkizip, Astanadaǵy ShYU Sammıtine arnalǵan tok-shoý men «Silk Way» telearnasynda «Jibek joly sımfonııasy» derekti fılmin kórsetti. Aldaǵy kúnderi CGTN arnasynda QR Prezıdenti Teleradıokesheniniń «Shanhaı rýhy» derekti fılmi kórsetiledi dep josparlanyp otyr.

QR Prezıdenti TRK dırektory Raýshan Qajybaevanyń aıtýynsha, «Teleradıokeshen men CMG arasyndaǵy yntymaqtastyq Qazaqstan men Qytaı arasyndaǵy strategııalyq seriktestik rýhyna sáıkes keledi jáne kópǵasyrlyq mádenıetaralyq jáne halyqaralyq dıalogti damytýǵa baǵyttalǵan».

QR Prezıdentiniń teleradıokesheni – tolyq tsıkldy qazaqstandyq medıa-kompanııa, quramyna: Jibek Joly respýblıkalyq telearnasy, Silk Way jáne Silk Way Cinema halyqaralyq telearnalary, Kazinform HAA jáne Derekti fılmder ortalyǵy kiredi.

Qytaı medıakorporatsııasy (CMG) – álemdegi eń iri medıa konglomerattardyń biri. Oǵan Qytaıdyń ortalyq televızııasy (CCTV), Qytaıdyń halyqaralyq televızııa jelisi (CGTN), Qytaı ulttyq radıosy (CNR) jáne Qytaı halyqaralyq radıosy (CRI) kiredi. Korporatsııa quramynda barlyǵy 47 telearna, 17 radıostantsııa jáne 17 gazet bar.