QR Prezıdenti TMD elderi basshylaryna – aımaǵymyzdy iri kólik-logıstıkalyq habqa aınaldyramyz

<p>Qasym-Jomart Toqaev týyndaıtyn syn-qaterlerdi eńserýge, tabysty yntymaqtastyqty nyǵaıtý úshin jańa salalardy izdeýge baǵyttalǵan TMD formatyndaǵy belsendi yqpaldastyqty jalǵastyrýǵa shaqyrdy, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform</a>&nbsp;Aqordaǵa silteme jasap.</p>

«Tyǵyz saýda-ekonomıkalyq baılanystardy damytý negizgi mindet bolyp qala beredi. Dostastyqqa múshe elderdiń naryqtary biz úshin qashanda basymdyqqa ıe. Ótken jyldyń qorytyndysy boıynsha Qazaqstannyń syrtqy saýda aınalymynyń tórtten birinen astamy TMD memleketterimen jasaldy. Bul oń dınamıka bıyl da saqtalyp otyr. Qazaqstannyń saýda aınalymy 7 aıda 4,4 paıyzǵa artyp, 20,6 mıllıard dollardy qurady. Biz saýda baılanystaryn odan ári nyǵaıtý úshin qolda bar múmkindikterdi tolyq paıdalanýymyz qajet», – dedi Qasym-Jomart Toqaev TMD-ǵa múshe Memleketter basshylary keńesiniń otyrysynda.

Memleket basshysynyń pikirinshe, saýda kedergilerin joıýǵa, qolaıly tarıftik jaǵdaı jasaýǵa, ákimshilik rásimderdi jeńildetýge basa mán berý qajet.

Sonymen qatar Prezıdent Dostastyq keńistigindegi kólik dálizderin damytý mańyzdy ekenine nazar aýdardy.

«Biz ózimizdiń biregeı geografııalyq artyqshylyǵymyzdy paıdalanyp, jahandyq naryqtardy ushtastyrýymyz kerek. Osylaısha, aımaǵymyzdy iri kólik-logıstıkalyq habqa aınaldyramyz. Álemde jańa ekonomıkalyq geografııa qalyptasyp, saýda aǵyndary ulǵaıa túsken qazirgi jaǵdaıda bul baǵyt strategııalyq mańyzǵa ıe bolady. Búginde Eýropa men Azııa arasyndaǵy qurlyqtyq-tranzıttik tasymaldyń 80 paıyzy Qazaqstan arqyly ótedi. Biz Transkaspıı kólik baǵytyn, «Soltústik – Ońtústik» dálizin odan ári damytýǵa, sondaı-aq «Qazaqstan – Túrikmenstan – Iran» temirjolynyń múmkindikterin tolyqqandy paıdalanýǵa aıryqsha mán beremiz. Qazaqstan «Dostyq – Moıynty», «Baqty – Aıagóz», «Darbaza – Maqtaaral» temirjol jobalaryn tezirek iske asyrýdy kózdeıdi», – dedi Qasym-Jomart Toqaev.

Keńeste sondaı-aq, Qyrǵyzstan Prezıdenti Sadyr Japarov, Ázerbaıjan Prezıdenti Ilham Álıev, Belarýs Prezıdenti Aleksandr Lýkashenko, Reseı Prezıdenti Vladımır Pýtın, Tájikstan Prezıdenti Emomalı Rahmon, Túrikmenstan Prezıdenti Serdar Berdimuhamedov, Ózbekstan Prezıdenti Shavkat Mırzıeev, TMD Bas hatshysy Sergeı Lebedev sóz sóıledi.

Eske salaıyq, Qazaqstan Prezıdenti Qasym-Jomart Toqaev búgin Qyrǵyzstanǵa jumys saparymen bardy.

Memleket basshysyn «Ala-Archa» rezıdentsııasynda Qyrǵyzstan Prezıdenti Sadyr Japarov qarsy aldy.

TMD-ǵa múshe Memleketter basshylary keńesiniń otyrysynda Q.Toqaev, sondaı-aq Taıaý Shyǵystaǵy qazirgi ahýalǵa pikir bildirdi, tsıfrlyq sheshimderdi engizý sharalarynyń mańyzyna toqtalyp,. TMD volonterleriniń jyl saıynǵy forýmyn ótkizýdi usyndy.

Aıta keteıik, 2024 jyldyń 1 qańtarynan TMD organdaryna tóraǵalyq etý Reseı Federatsııasyna ótedi.