QR Prezıdenti Ózbekstannyń Syrtqy ister mınıstri Bahtıer Saıdovty qabyldady
Bul týraly Aqordanyń baspasóz qyzmetinen málim boldy.
Prezıdent Qasym-Jomart Toqaev Ózbekstannyń syrtqy saıasat vedomstvosynyń basshysyna iltıpat bildire otyryp, qazaq-ózbek yntymaqtastyǵy barlyq salada qarqyndy damyp kele jatqanyn atap ótti.
Onyń aıtýynsha, Qazaqstan baýyrlas Ózbekstanmen ózara qarym-qatynasty odan ári nyǵaıtýǵa basa mán beredi.
Qasym-Jomart Toqaev Shavkat Mırzıeevtiń ekijaqty baılanystardy tereńdetý isine eleýli úles qosyp otyrǵanyna toqtalyp, Qazaqstan óńir halyqtarynyń ıgiligi men ósip-órkendeýine baǵyttalǵan Ózbekstannyń bastamalaryn aldaǵy ýaqytta da qoldaýǵa daıyn ekenin jetkizdi.
Kezdesý barysynda saýda-ekonomıkalyq yqpaldastyqty keńeıtý máseleleri talqylandy. Eki eldiń damýyna tyń serpin beretin jańa baǵyttardy qarastyrý jáne ekijaqty taýar aınalymyn arttyrý mańyzdy ekeni aıtyldy.
Memleket basshysy kólik-tranzıt salasyndaǵy yntymaqtastyqty nyǵaıtýdyń máni zor ekenin atap ótti. Prezıdent Qazaqstannyń «Darbaza – Maqtaaral» temirjol jelisin salýǵa kiriskenin málimdedi. Bul joldy odan ári Ózbekstan shekarasyna jetkizý kózdelip otyr. Atalǵan temirjol baılanysy eki el arasyndaǵy júk tasymalynyń kólemin ulǵaıtýǵa múmkindik beredi. Qasym-Jomart Toqaev Ózbekstan tarapynyń Transkaspıı halyqaralyq kólik baǵdaryn damytý isine atsalysýy barlyq tarapqa tıimdi bolady dep sanaıdy.
Óz kezeginde Bahtıer Saıdov qurmet kórsetkeni úshin Memleket basshysyna alǵys aıtyp, Ózbekstan Prezıdentiniń izgi tilegin jetkizdi.
Mınıstrdiń aıtýynsha, eki el basshylary Qazaqstan men Ózbekstan arasyndaǵy odaqtastyq qarym-qatynasty nyǵaıtý úshin joǵary meje qoıyp otyr. Osyǵan oraı Bahtıer Saıdov buǵan deıin joǵary deńgeıde qol jetkizilgen ýaǵdalastyqtardy sapaly júzege asyrý jónindegi birlesken jumys josparyn baıandady.
Sonymen qatar kezdesý barysynda sý sharýashylyǵy salasyndaǵy yntymaqtastyq jáne Ortalyq Azııadaǵy óńirlik qaýipsizdikti qamtamasyz etý máseleleri talqylandy.
Budan bólek, aldaǵy ýaqytqa josparlanǵan ekijaqty jáne kópjaqty sıpattaǵy kezdesýler men is-sharalar kestesi qarastyryldy.