QR Prezıdenti Qorǵanys mınıstri Rýslan Jaqsylyqovty qabyldady

<p>ASTANA. KAZINFORM - Memleket basshysy Qorǵanys mınıstri Rýslan Jaqsylyqovty qabyldady, dep habarlaıdy Aqordanyń <a href="https://www.akorda.kz/kz/memleket-basshysy-korganys-ministri-ruslan-zhaksylykovty-kabyldady-13039" target="_blank" rel="noopener">baspasóz</a> qyzmeti.</p>

Prezıdent – Qarýly Kúshterdiń Joǵarǵy Bas qolbasshysy Qasym-Jomart Toqaevqa armııanyń jaýyngerlik daıyndyǵynyń jaı-kúıi týraly baıandaldy.

Rýslan Jaqsylyqov áskerı bólimshelerdiń jedel is-qımyldarǵa jáne jaýyngerlik daıyndyǵy, basqarý organdary men jeke quramdy oqytýǵa baǵyttalǵan negizgi kúsh-jiger jóninde aıtty.

Sonymen qatar Qarýly Kúshterdiń daǵdarys jaǵdaıynda, onyń ishinde qazirgideı sý tasqynyna qarsy kúres kezinde ortalyq jáne jergilikti bılik organdarymen tıimdi baılanys ornatýy mańyzdy ekenine nazar aýdaryldy.

Prezıdentke Qarýly Kúshterdi zamanaýı tehnıkamen jáne qarý-jaraqpen jaraqtandyrý, aýmaqtyq qorǵanys áskerlerin kúsheıtý, áskerı ınfraqurylymdy jetildirý isi jóninde málimet berildi. Qazaqstannyń ShYU men UQShU-ǵa tóraǵalyǵy aıasynda 2024 jylǵa josparlanǵan sharalar, sondaı-aq aýqymdy oqý-jattyǵý jıyndaryn, onyń ishinde halyqaralyq deńgeıdegi is-sharalar ótkizý jaıynda aıtyldy.

Budan bólek, Memleket basshysyna vedomstvonyń jaýyngerlik-patrıottyq tárbıe berý, kóktemgi merzimdi áskerı qyzmetke shaqyrý, áskerı qyzmetshilerdiń áleýmettik mártebesin jáne áskerı qyzmettiń bedelin arttyrý jumystary týraly baıandaldy.

Prezıdent BUU aıasynda Golan jotalaryndaǵy qazaqstandyq bitimgerlik kontıngent qyzmetiniń mańyzdy ekenin atap ótti.

Kezdesý sońynda Qasym-Jomart Toqaev mınıstrge Qarýly Kúshterdiń jaýyngerlik áleýetin odan ári arttyrý jóninde birqatar mindet júktedi.