Prezıdent – Qazaqstan qazaq tiliniń mártebesin kúsheıtý saıasatyn jalǵastyra beredi
«Bıyl TMD-da «Orys tili jyly» dep jarııalanýynyń sımvoldyq máni bar. Sonymen qatar biz búgin Orys tiline qatysty halyqaralyq uıym qurý týraly Shart pen Jarǵyǵa qol qoıý jóninde tarıhı sheshim qabyldaımyz. Bul uıym derbes halyqaralyq qurylymǵa aınalady, quqyq sýbektisi retinde tanylady. Jańa uıym barlyq el úshin ashyq bolady. Árıne, bul – jahandyq gýmanıtarlyq yntymaqtastyq turǵysynan óte ózekti. TMD keńistiginde jáne odan áldeqaıda keńirek halyqaralyq aýqymda orys tilin nasıhattaý úshin qabyldanyp jatqan sharalar elderimizdiń ulttyq biregeıligin nyǵaıtý úrdisine keri áser etpeıdi. Qazaqstan qazaq tiliniń memlekettik til mártebesin kúsheıtý saıasatyn jalǵastyra beredi», – dedi Memleket basshysy TMD-ǵa múshe Memleketter basshylary keńesiniń otyrysynda.
Prezıdent Dostastyq elderiniń volonterler birlestikteriniń kúsh-jigerin jumyldyrý mańyzdy ekenine nazar aýdardy.
«2024 jyldy TMD-da Volonterlik qozǵalys jyly dep jarııalaý bastamasyn quptaımyz. Qazaqstan 2020 jyldy Volonter jyly retinde atap ótti. Eriktilerdiń izgi amaldary qoǵamymyzda tileýlestik, meıirimdilik jáne janashyrlyq qasıetteriniń tereń tamyr jaıýyna eleýli úles qosady. Mundaı adamgershilik talpynystarǵa jan-jaqty qoldaý kórsetý mańyzdy», – dedi Qasym-Jomart Toqaev.
Prezıdent Dostastyq elderi eriktileriniń jyl saıynǵy forýmyn ótkizýdi jáne oǵan TMD-nyń turaqty alańy mártebesin berýdi usyndy.
Memleket basshysy sóziniń sońynda 2024 jyly Reseı Federatsııasynyń TMD-ǵa tóraǵalyq etýi jáne kezekti sammıtti kelesi jyly kúzde Máskeýde ótkizý týraly sheshimdi qoldady. Sondaı-aq Ózbekstan Prezıdenti Shavkat Mırzıeevti TMD-nyń Qurmet belgisimen marapattaý týraly Qyrǵyzstannyń bastamasyn quptady.
Keńeste sondaı-aq, Qyrǵyzstan Prezıdenti Sadyr Japarov, Ázerbaıjan Prezıdenti Ilham Álıev, Belarýs Prezıdenti Aleksandr Lýkashenko, Reseı Prezıdenti Vladımır Pýtın, Tájikstan Prezıdenti Emomalı Rahmon, Túrikmenstan Prezıdenti Serdar Berdimuhamedov, Ózbekstan Prezıdenti Shavkat Mırzıeev, TMD Bas hatshysy Sergeı Lebedev sóz sóıledi.
Qasym-Jomart Toqaev, keshe, 12 qazan kúni Aqordada «Qazaq tili» qoǵamynyń prezıdenti, Ulttyq quryltaıdyń múshesi Raýan Kenjehanulyn qabyldap, qazaq tilin damytýǵa baǵyttalǵan birqatar tapsyrma bergen bolatyn.
Eske salaıyq, Qazaqstan Prezıdenti Qasym-Jomart Toqaev búgin Qyrǵyzstanǵa jumys saparymen bardy.
Memleket basshysyn «Ala-Archa» rezıdentsııasynda Qyrǵyzstan Prezıdenti Sadyr Japarov qarsy aldy.
TMD-ǵa múshe Memleketter basshylary keńesiniń otyrysynda Q.Toqaev, sondaı-aq Taıaý Shyǵystaǵy qazirgi ahýalǵa pikir bildirdi, TMD formatyndaǵy belsendi yqpaldastyqty jalǵastyrýǵa shaqyryp, tsıfrlyq sheshimderdi engizý sharalarynyń mańyzyna toqtaldy.
Aıta keteıik, 2024 jyldyń 1 qańtarynan TMD organdaryna tóraǵalyq etý Reseı Federatsııasyna ótedi.