QR Prezıdent ákimshiliginiń ókili Túrkistan oblysynda MÁMS júıesiniń júzege asýyn tekserdi

NUR-SULTAN. QazAqparat - 2020 jyldyń 1 sáýirinen bastap saqtandyrylmaǵan naýqastarǵa medıtsınalyq kómek kórsetile beredi, biraq tegin medıtsınalyq kómektiń kepildendirilgen kólemi aıasynda ǵana. Qalǵan qyzmetter aqyly túrde júrgiziledi. Sondyqtan, 31 naýryzǵa deıin saqtandyrylǵan mártebesin alý mańyzdy, dep habarlaıdy Túrkistan oblystyq ákimdiginiń baspasóz qyzmeti.

Túrkistan oblysy ákimdiginde ótken jıyn barysynda Prezıdent ákimshiliginiń memlekettik ınspektory Serik Qojanııazov óńirdegi Mindetti áleýmettik medıtsınalyq saqtandyrý júıesimen jumys jasap jatqan medıtsınalyq uıymdardyń daıyndyǵyn tekserdi. Memlekettik ınspektordyń aıtýynsha, aımaqtaǵy medıtsınalyq uıymdardyń materıaldy-tehnıkalyq bazasy tolyqtyrylyp, turǵyndarǵa qyzmet jasaýǵa daıyn otyr.

Túrkistan oblysy ákiminiń orynbasary Joldymurat Amanbaev aımaqta jasalyp jatqan jumystardyń udaıy nazarda ekeniń aıtty. Júıege halyqty tolyqtaı qamtýǵa qatysty tıisti sharalar sandyq negizge engizilip jatyr.

Máselen, kez kelgen adam óziniń medıtsınalyq saqtandyrý júıesine qatysyp jatqany, ne mártebesin anyqtaý úshin aqparatty elektrondyq úkimet portalynan tabady. Jumyspen qamtylǵan azamattarǵa medıtsınalyq qyzmetterdi qoljetimdi etý maqsatynda biryńǵaı jıyntyq tólemi engizilgen. Osyǵan oraı, memlekettik jáne jekemenshik medıtsınalyq uıymdarda qyzmet kórsetý termınaldary qoıyldy.