QR Premeri TMD Úkimet basshylary keńesi aıasynda birqatar kezdesýler ótkizdi
Bul týraly QazAqparat primeminister.kz saıtyna silteme jasap habarlaıdy.
Ázerbaıjan Respýblıkasynyń Premer-Mınıstri Novrýz Ismaıl oglý Mamedovpen ekijaqty kezdesý barysynda aýyl sharýashylyǵy, energetıka, kólik jáne logıstıka, azyq-túlik jáne metallýrgııa ónerkásibi, farmatsevtıka salasyndaǵy ekijaqty saýda-ekonomıkalyq yntymaqtastyqty odan ári nyǵaıtý, sondaı-aq ındýstrııalandyrý jáne aqparattyq tehnologııalardy damytý salasyn qosa alǵanda, ınvestıtsııalyq jobalardy birlesip júzege asyrý máseleleri talqylandy.
Bıyl elder arasynda saýda-ekonomıkalyq yntymaqtastyqtyń oń qarqyny baıqalady. Buǵan 2017 jyly eki Memleket basshylary kezdesýiniń qorytyndysy boıynsha qolǵa alynǵan eksportty damytý jáne taýar aınalymyn ulǵaıtý maqsatynda atqarylyp jatqan belsendi birlesken jumystar yqpal etti. Sonymen qatar, saýda-sattyq, energetıka, aýyl sharýashylyǵy, kólik, logıstıka jáne t.b. salalardaǵy naqty sharalardy qarastyratyn, QR men ÁR arasyndaǵy 2017-2020 jyldarǵa arnalǵan saýda-ekonomıkalyq yntymaqtastyqty keńeıtý jónindegi Jol kartasyn iske asyrý men ekijaqty Úkimetaralyq komıssııa mańyzdy ról atqarady.
Bıyl qarasha-jeltoqsan aılarynda Bakýde mádenı qatynastar salasyndaǵy kelisimderdi júzege asyrý maqsatynda Ázerbaıjandaǵy Qazaqstan mádenıetiniń kúnderin ótkizý josparlanǵan.
2018 jyldyń 8 aıynda Qazaqstan men Ázerbaıjan arasyndaǵy taýar aınalymy $168,1 mln qurap, ótken jyldyń sáıkes kezeńimen salystyrǵanda 2,1 ese ósti ($81,5 mln). Ázerbaıjanǵa eksport kólemi 2,2 esege ósip, $134,6 mln qurady, al ımport $33,5 mln qurady. Osy jyldyń 8 aıynda Qazaqstannyń porttary arqyly Ázerbaıjan baǵytynda 1,3 mln tonnaǵa jýyq júk aýystyryp tıeldi. Aqtaý porty - 202 myń tonna nemese 2017 jyldyń osyndaı kezeńindegi kórsetkishtiń 32% (624 myń tonna); Quryq porty - 1141 myń tonna, bul ótken jylǵy kórsetkishten 66%-ǵa joǵary (756 myń tonna).
Armenııa Respýblıkasynyń Birinshi Vıtse-Premeri Ararat Mırzoıanmen kezdesýde energetıka, mádenı-gýmanıtarlyq salalardaǵy, sondaı-aq hımııa ónerkásibi, azamattyq avıatsııa, mashına jasaý jáne AT-salasynda birlesken ınvestıtsııalyq jobalardy iske asyrý salasynda eki eldiń saýda-ekonomıkalyq yntymaqtastyǵyn keńeıtý máseleleri talqylandy.
Armenııaǵa metaldar men olardan jasalǵan buıymdardy, azyq-túlik taýarlaryn, mal jáne ósimdik ónimderin, temirjol mashınasyn jasaý ónimderin jetkizý perspektıvalary qaraldy.
Taraptardyń pikirinshe, búgingi tańda elder arasyndaǵy ózara tıimdi ekonomıkalyq yntymaqtastyqty damytýǵa barlyq jaǵdaı jasalǵan. Saýda-ekonomıkalyq yntymaqtastyq jónindegi úkimetaralyq komıssııa belsendi túrde jumys istep jatyr.
Budan ózge, kezdesýge qatysýshylar aqparattyq tehnologııalardy damytýǵa degen ortaq umtylys naryqtyq ekonomıka men ádil básekelestik qaǵıdattaryna negizdelgen Qazaqstan-Armenııa bıznesin damytýǵa ózara tıimdi jaǵdaılar jasaıtynyn atap ótti.
Áńgimelesý barysynda aımaqtyq qaýipsizdik jáne terrorızmge qarsy kúres máselelerine erekshe kóńil bólindi.