QR Premer-Mınıstri ÚIIDMB 2 besjyldyǵy tujyrymdamasy jobasyn daıyndaý máselesi boıynsha otyrys ótkizdi

ASTANA. 10 shilde. QazAqparat - Búgin Úkimet úıinde QR Premer-Mınıstri Serik Ahmetov selektorlyq rejimde QR Údemeli ındýstrıaldyq-ınnovatsııalyq damýdyń ekinshi besjyldyǵy tujyrymdamasynyń jobasyn daıyndaý boıynsha Basqarýshy komıtettiń birinshi otyrysyn ótkizdi.

Memleket basshysynyń tapsyrmasyna sáıkes Tujyrymdamany 2013 jyldyń 1 qarashasyna deıin ázirleý qajet. Premer-Mınıstrdiń orynbasary - QR Indýstrııa jáne jańa tehnologııalar mınıstri Áset Isekeshev Tujyrymdama jobasyn daıyndaý barysyndaǵy negizgi tásilder, mindetter men kezeńder týraly baıandady.

Atap aıtqanda, 2010-2014 jyldarǵa arnalǵan ÚIID baǵdarlamasy oryndalysynyń negizgi nátıjelerin baǵalaý, ony damytýǵa yqpal etetin qoldanystaǵy óndiristi qoldaý quraldaryn jáne ǵalamdyq trendterdi saralaý usynylady.

Sondaı-aq, ındýstrıaldyq-ınnovatsııalyq damýdyń stsenarıılerin daıyndaý, basymdyqty salalyq sektorlar men klasterlerdi irikteý boıynsha kepildemelerge, óndiristik saıasattyń úzdik halyqaralyq tájirıbelerin taldaý máselelerine basa nazar aýdarylady.
Budan basqa, ındýstrıaldyq-ınnovatsııalyq damýdyń 2020 jylǵa mindetteri men maqsattarynyń negizgi sıpattaryn anyqtaý, ÚIIDMB oryndaýdy basqarý tetikterin, onyń nátıjelerin sıpattaıtyn kórsetkishter júıesin daıyndaý josparlanýda.
Talqylaýdy túıindeı kele, S.Ahmetov Tujyrymdama jobasyn jasaý barysynda «ótken jyldardaǵy ındýstrıaldyq-ınnovatsııalyq damýdyń birinshi kezeńiniń tájirıbelerin esepke alyp, halyqaralyq ozyq úlgilerdi qoldaný qajettigin» atap kórsetti.
«Bizdiń aldymyzǵa álemdik ekonomıka tartatyn tosyn jaılardy qaperge alý qajet. Bul máselelerdiń bári Tujyrymdamany qalyptastyrý barysynda eskerilýi tıis», - dedi S.Ahmetov.
Sondaı-aq, Úkimet basshysy oblystar men Astana jáne Almaty qalalarynyń ákimderine Tujyrymdama jobasyn daıyndaýǵa belsene qatysýdy tapsyrdy.