QR Premer-Mınıstri: TMD elderi derbestiginiń faktoryn kúsheıtý qajet
Qazaqstan Úkimetiniń basshysy COVID-19 taralýymen kúresý, ekonomıkany turaqtandyrý, óndiristiń jańa qurylymyn qalyptastyrý, turǵyndar men bıznesti qoldaý boıynsha Qazaqstannyń qabyldap jatqan sharalary týraly habarlady. Bul rette ol ulttyq ekonomıka deńgeıinde ǵana emes, tutas TMD aıasynda da daǵdarysqa qarsy sharalardy qabyldaýdy odan ári jalǵastyrýdyń qajettigin atap ótti.
QR Premer-Mınıstri ulttyq ekonomıka aıasynda da, sondaı-aq búkil Dostastyq formatynda da daǵdarys kórinisterine qarsy turaqtylyq býferlerin ujymdyq qalyptastyrýdy TMD úshin negizgi mindet retinde atady. Bul turǵyda Úkimet basshysy 2030 jylǵa deıingi TMD ekonomıkalyq damý strategııasyn ázirleý boıynsha jasalyp jatqan jumystardy atap ótti, onda saýda, ónerkásip, energetıka, kólik, ınfraqurylym, agroónerkásip kesheni, shaǵyn jáne orta bıznes, tsıfrlandyrý jáne basqa da yntymaqtastyq salalary qamtylǵan.
«Qalyptasyp otyrǵan dınamıkany eskere otyryp, elderimizdiń ózin-ózi qamtamasyz etý faktoryn kúsheıtý qajet. Eń aldymen, bul azyq-túlikpen qamtamasyz etý máselelerine qatysty – biz ónimderdi jetkizýdiń turaqtylyǵy az jáne geografııalyq bytyrańqy tizbegine táýeldilikti tómendetýimiz kerek», — dedi A. Mamın.
Premer-Mınıstr Dostastyq elderiniń paıdasy úshin taýarlar men qyzmetter saýdasynyń iri eksporttyq jáne ımporttyq aǵyndaryn qaıta baǵdarlaý jóninde sharalar qabyldaýdyń, syrtqy jáne ishki ınvestıtsııalardy, aldyńǵy qatarly tehnologııalardy tartý jumystaryn kúsheıtýdiń, tranzıttik saýdadaǵy kedergilerdi júıeleýdiń jáne olardy azaıtýdyń, TMD-ǵa qatysýshy elderdiń ekonomıkasynyń básekelestik artyqshylyqtary negizinde óndiristik protsesterdi óńirlendirýdiń qajettigin atap ótti.
Sonymen qatar otyrysqa Ázerbaıjan Premer-Mınıstri Alı Idoıat oglý Asadov, Belarýs Premer-Mınıstri – Sergeı Rýmas, Moldova Premer-Mınıstri – Ion Kıký, Reseı Premer-Mınıstri – Mıhaıl Mıshýstın, Tájikstan Premer-Mınıstri – Kohır Rasýlzoda, Ózbekstan Premer-Mınıstri – Abdýlla Arıpov, Armenııa vıtse-premer-mınıstri Mger Grıgorıan, Qyrǵyzstan vıtse-premer-mınıstri Erkın Asrandıev jáne Túrikmenstan mınıstrler kabınetiniń tóraǵasynyń orynbasary Rashıd Meredov qatysty.
Otyrysqa qatysýshylar TMD aıasyndaǵy ekonomıkalyq ózara is-qımyldyń ózekti máselelerin, COVID-19 koronavırýs ınfektsııasynyń taralýymen kúres jónindegi birlesken kúsh-jiger, sondaı-aq 2030 jylǵa deıingi TMD ekonomıkalyq damý strategııasynyń jobasyn talqylady.
TMD ÚBK otyrysynyń qorytyndysy boıynsha qarýly kúshter baılanysynyń birlesken (biriktirilgen) júıesi týraly, TMD Jelilik ýnıversıtetin qurý jáne iske qosý týraly kelisimder, 2030 jylǵa deıin kólik, jastar saıasaty, týrızm, sport, mádenıet jáne t. b. salalardaǵy yntymaqtastyq strategııasy jáne basym baǵyttar týraly sheshimder qabyldandy.