QR Premer-Mınıstri Oral áýejaıynyń jumysyn tekserdi
Kólik ınfraqurylymynyń strategııalyq mańyzdy nysandarynyń, birinshi kezekte, áýejaılar men temirjol vokzaldarynyń qaýipsizdik máselelerine elimizde erekshe kóńil bólinedi.
Qaýipsizdik sharalaryn kúsheıtip, qamtamasyz etý qajettigi týraly QR Prezıdenti N. Nazarbaev bıyl 5 maýsymda Aqtóbede jáne 18 shildede Almatyda oryn alǵan oqıǵalarǵa baılanysty ótken Qaýipsizdik keńesi otyrysynda aıtty.
«Basqa elder úlgisinde barlyq áýejaılardy, avto- jáne temirjol vokzaldaryn zamanaýı tekserý júıelerimen, aýlalardy - sapaly beınebaqylaýmen qamtamasyz etý qajet. Bul sharalardyń barlyǵy azamattarǵa qolaısyzdyq týǵyzbaýy tıis», - dep atap ótti Memleket basshysy.
Jumys barysynda terrorızm qateri faktoryn eskerýmen qaýipsizdik sharalaryn kúsheıtý týraly nusqaý barlyq tıisti uıymdarǵa, onyń ishinde Qazaqstannyń áýejaılary men áýe kompanııalaryna jiberildi.
Premer-Mınıstr Oral áýejaıyn kórip, onyń qaýipsizdik júıesimen tanysty, áýe aılaǵynyń shtattyq jumysyn qamtamasyz etý sharalary týraly baıandamany tyńdady.
Oral halyqaralyq áýejaıy 1972 jyly paıdalanýǵa berilgen. Aerovokzal saǵatyna 200 jolaýshyny, al termınal 100 jolaýshyny ótkizýge qaýqarly. Áýejaı kesheni qajetti arnaıy tehnıkamen jabdyqtalǵan jáne áýe kemelerine qyzmet kórsetetin, jolaýshylar jáne ushý-qoný jolaǵy men perron jumysyn qamtamasyz etetin personaldar qarastyrylǵan.
Aıta keteıik, 2014 jyly áýejaıdyń ushý jolaǵyn qaıta jóndeý jumystary júrgizile bastalǵan bolatyn, jyl sońyna qaraı, jóndeý jumystarynyń birinshi kezeńi aıaqtalǵannan keıin áýejaı óz jumysyn jandandyrdy. Ekinshi kezeń 2015 jyldyń mamyr aıynda bastalyp, sol jyldyń sońynda aıaqtalǵan.