QR Premer-Mınıstri Qyzylorda oblysynyń áleýmettik-ekonomıkalyq jaǵdaıyn baǵalap qaıtady

ASTANA. QazAqparat - Premer-Mınıstr Kárim Másimov jumys saparymen barǵan Qyzylorda oblysynyń áleýmettik-ekonomıkalyq jaǵdaıyn jeke ózi baǵalap qaıtpaq, dep habarlaıdy pm.kz.

Úkimet basshysy búgin Qyzylorda oblysyna keldi. Óziniń týıtterdegi akkaýntynda: «Kraınıı» áýejaıyna keldim. Búgin zymyran sátti ushyryldy» dep jazdy.

Premer-Mınıstrdiń jumys sapary «Kraınıı» áýejaıyn kórýden bastaldy. Búgin munda «Baıqońyr» ǵarysh aılaǵyndaǵy «Gagarın tuǵyrynan» «Soıýz MS» jańa serııasynyń alǵashqy «Soıýz-FG» zymyran-tasymaldaýshysy sátti ushyryldy. 

«Soıýz MS» basqarylatyn keme  bortynda MKS-48/49 uzaq ekspedıtsııasynyń músheleri ǵaryshker Anatolıı Ivanıshın, astronavt DjAKSA Takýıa Onıshı jáne NASA ǵaryshkeri Ketlın Rýbıns bar. Kemeniń ǵarysh stansasymen túıisýi 2016 jyldyń 9 shildesine josparlanǵan.

Aıta keteıik, Premer-Mınıstrdiń jumys sapary baǵdarlamasynda Baıqońyr qalasyna jáne Qyzylorda oblysynyń eldi mekenderine barý josparlanǵan. Munda Premer-Mınıstr qalanyń jáne qala aınalasyndaǵy eldi mekender damýynyń bas josparymen tanysady jáne orta mektep, balalardy oqytý-saýyqtyrý ortalyǵyna barady, Jaqsyqylysh aýylynyń turǵyndarymen júzdesedi.

Sonymen birge, Kárim Másimov sýarmaly jer, sý sharýashylyǵy ınfraqurylymyn qalpyna keltirý týraly respýblıkalyq keńes ótkizedi dep josparlanýda jáne Aral problemasy,  óńirdegi agro-óndiristik keshen, shaǵyn jáne orta bıznes máseleleri de talqylanatyn bolady.