QR Premer-Mınıstri «Cisco» vıtse-prezıdentimen kezdesti

ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaev TMD elderindegi jumys jónindegi vıtse-prezıdent Djonatan Sperroý basshylyq etken amerıkalyq «Cisco» kompanııasynyń ókilderimen kezdesti, dep habarlaıdy primeminister.kz .

Kezdesý barysynda Memleket basshysy N. Nazarbaevtyń Cisco Systems dırektorlar keńesiniń tóraǵasy Djon Chemberspen kezdesýiniń nátıjesinde qol jetkizilgen ýaǵdalastyqtardy iske asyrý boıynsha birlesken jobalardyń aǵymdaǵy nátıjeleri talqylandy.

Sondaı-aq, eki tarap bilim berý, elektrondy úkimet, ıntellektýaldy kólik, taý-ken óndirý tehnologııalary salasyndaǵy jobalardyń iske asyrylý barysy men QR Premer-Mınıstri Baqytjan Saǵyntaevtyń bıyl sáýir aıynda Amerıka Qurama Shtattaryna barǵan jumys sapary aıasynda atalǵan jobalar boıynsha qol qoıylǵan kelisimderdi qarady.

«Tsıfrlyq Qazaqstan» memlekettik baǵdarlamasynyń jobasyn «Aqyldy qala», «Elektrondy úkimet», «Tsıfrlyq ekonomıka úshin ІT bilimdi arttyrý», «Jańa býyn shahtalary», «Derekterdi óńdeýdiń biryńǵaı memlekettik ortalyǵy», «Eldegi aqparattyq qaýipsizdikti basqarý salasyndaǵy ındýstrııalyq taldaý júıesi» sekildi jobalarmen biriktirýdiń nátıjesindegi ekonomıkalyq áserge erekshe nazar aýdaryldy.