QR Parlamenti Senatynyń tóraǵasy Valentına Matvıenkomen kezdesti

MÁSKEÝ. QazAqparat – Máskeýde Qazaqstan Respýblıkasy Parlamenti Senatynyń tóraǵasy Darıǵa Nazarbaeva RF Federaldyq Jınalysy Federatsııa Keńesiniń spıkeri Valentına Matvıenkomen kezdesti, dep habarlaıdy «QazAqparat» HAA menshikti tilshisi.

Kezdesýdi ashqan Valentına Matvıenko Qazaqstan men Reseı qarym-qatynastarynyń joǵary deńgeıine toqtaldy.

«Sizden meniń Nursultan Ábishulyna shyn júrekten jáne izgi tilekterimdi jetkizýińizdi suraımyn. Biz jyldar boıy bir-birimizdi bilemiz. Men onyń izgi qarym-qatynasyn qatty baǵalaımyn. Árqashan oǵan úlken qurmetpen qaraımyn. Ol shynymen de, Qazaqstannyń memlekettiliginiń jańa paraǵyn jazyp, Reseı-Qazaqstan qarym-qatynastarynyń damýyna úlken úles qosty», - dedi ol.

Óz kezeginde Darıǵa Nazarbaeva Krasnoıarsk aımaǵynda bógettiń buzylýy saldarynan adamdar kóz jumǵan jaǵdaıǵa baılanysty kóńil aıtty.

Sondaı-aq Senat spıkeri Valentına Matvıenkony Federatsııa Keńesiniń tóraǵasy bolyp qaıta saılanýymen quttyqtady. Ol sonymen qatar, Elbasy Nursultan Nazarbaev pen Qazaqstan Prezıdenti Qasym-Jomart Toqaevtyń quttyqtaýyn jetkizdi.

«Biz parlamentaralyq baılanystardyń qarqyndy damyp jatqanyn árqashan úlken optımızmmen atap ótemiz», - dedi palata basshysy.

Kezdesý barysynda Darıǵa Nazarbaeva birlesken sheshimdi qajet etetin, sonyń ishinde Parlament deńgeıinde talap etetin birqatar problemany atady. Naqtyraq aıtqanda, eki el azamattarynyń baryp-kelý rejımindegi teńgerimsizdiktiń jalǵasyp jatqandyǵy, shekaradan ótkizý pýnktterin keńeıtý qajettiligi, sondaı-aq Jaıyq ózenindegi ekologııalyq máseleler atap ótti.