QR OSK tóraǵasy TMD baıqaýshylarymen kezdesti

NUR-SULTAN. QazAqparat - Búgin QR OSK Tóraǵasy Berik Imashev TMD Atqarý komıteti tóraǵasynyń birinshi orynbasary - Atqarýshy hatshysy Vıktor Gýmınskımen kezdesti, dep habarlaıdy QazAqparat tilshisi.

Ortsaılaýkomnyń Tóraǵasy TMD–dan baıqaýshylar Mıssııasynyń múshelerin saılaýdyń jarııalanǵanynan bastap daýys berý kúnine deıingi úgit jumystarynyń negizgi kezeńderimen qysqasha tanystyrdy.

Vıktor Gýmınskıı óz kezeginde Berik Imashevqa kezdesýdi uıymdastyrǵany úshin alǵysyn bildirip, TMD baıqaýshylar Mıssııasynyń baıqaý ádisteri men prıntsıpteri týraly habardar etti.

«Bizdiń kezdesýimizden keıin, osy kúnnen bastap TMD-dan kelgen baıqaýshylar Mıssııasynyń Shtaby Qazaqstan Respýblıkasyndaǵy kezekti parlamenttik saılaýyn baıqaý jónindegi óz jumysyn bastaıdy», - dedi V. Gýmınskıı.

TMD-dan baıqaýshylar Mıssııasy Qazaqstandaǵy saılaýdy, onyń ishinde Qazaqstan Respýblıkasy Parlamenti Májilisiniń depýtattaryn saılaýdy baıqaý boıynsha úlken tájirıbege ıe ekenin atap ótken jón. TMD-dan baıqaýshylar Qazaqstanda on tórtinshi ret baıqaý júrgizedi.