QR OSK tóraǵasy qazaqstandyqtarǵa úndeý jarııalady

ASTANA. QazAqparat – QR Ortalyq saılaý komıssııasynyń tóraǵasy Nurlan Ábdirov saılaý aldyndaǵy tynyshtyq qarsańynda úmitkerlerge úndeý jasady, dep habarlaıdy QazAqparat tilshisi.

«Saılaý» týraly konstıtýtsııalyq zańnyń normalaryna sáıkes, saılaý aldyndaǵy úgit-nasıhat saılaý bolatyn kúnniń aldynda jergilikti ýaqytpen saǵat 00:00-de aıaqtalady. Osylaısha búgin saılaýaldy úgittiń sońǵy kúni. Saılaý protsesine qatysýshylardyń barlyǵynyń nazaryn, erteń ıaǵnı 19 qarasha – tynyshtyq kúni ekenine aýdarǵym keledi. ıAǵnı búgin túngi 00:00-den saılaý kúnine deıin tynyshtyq kúni jarııalanady. Osyny este saqtańyzdar», - dedi N. Ábdirov Ortalyq saılaý komıssııasynda ótken jınalysta.

Tynyshtyq kúni saılaýaldy úgit-nasıhatpen baılanysty kez kelgen is-áreketke tyıym salynady jáne ol úshin zańnama men quqyqtyq jaýapkershilik kózdelgen.

Búgingi OSK otyrysynda osy máseleler boıynsha ýákiletti jáne qadaǵalaý organdarynyń aqparaty tyńdaldy. QR Aqparat jáne qoǵamdyq damý vıtse-mınıstri Danııar Qadyrov QR Prezıdenttigine kandıdattardyń BAQ-ta júrgizgen saılaýaldy úgit qorytyndylaryn baıandady.