QR OSK TMD baıqaýshylary mıssııasynyń 12 baıqaýshysyn tirkedi

ASTANA. QazAqparat - Búgin QR Ortalyq saılaý komıssııasy «2016 jylǵy 20 naýryzǵa taǵaıyndalǵan Qazaqstan Respýblıkasy Parlamenti Májilisi depýtattarynyń kezekten tys saılaýyna jáne máslıhattary depýtattarynyń kezekti saılaýyna halyqaralyq uıymnyń baıqaýshylaryn akkredıtteý týraly» qaýly qabyldady.

Komıssııa múshesi Tatıana Ohlopkovanyń atap ótýinshe, atalǵan qaýlyǵa sáıkes Ortalyq saılaý komıssııas Qazaqstan Respýblıkasy Syrtqy ister mınıstrliginiń usynysymen Táýelsiz Memleketter Dostastyǵynan baıqaýshylar mıssııasynyń 12 baıqaýshysyn akkredıtteıdi.

«Tizim qosa berilip otyr. Búgin akkredıtteıtin baıqaýshylar qatarynda TMD baıqaýshylary mıssııasynyń basshysy Sergeı Lebedev jáne mıssııa shtabynyń jetekshisi Evgenıı Sloboda bar», - dedi ol.

Aıta keteıik, 18 aqpandaǵy jaǵdaıǵa sáıkes Ortsaılaýkom halyqaralyq uıymdardyń 2 mıssııasynyń (EQYU/DIAQB pen TMD) 52 baıqaýshysyn akkredıttedi.

Shet memleketter men halyqaralyq uıymdardyń baıqaýshylaryn akkredıtteýdi Ortsaılaýkom 2016 jylǵy 14 naýryzǵa deıin júzege asyrady.