QR OSK taǵy 133 baıqaýshyny akkredıttedi

ASTANA. QazAqparat - Búgin QR Ortalyq saılaý komıssııasynyń otyrysynda 2016 jylǵy 20 naýryzǵa taǵaıyndalǵan QR Parlamenti Májilisiniń depýtattaryn saılaýǵa halyqaralyq uıymnan jáne shet memleketten taǵy 133 baıqaýshy akkredıtteldi.

Sáıkesinshe qaýly jobasyn tanystyrǵan QR OSK múshesi Tatıana Ohlopkovanyń atap ótýinshe, qujatqa sáıkes Ortalyq saılaý komıssııasy Qazaqstan Respýblıkasy Syrtqy ister mınıstrliginiń usynysy boıynsha bir halyqaralyq uıymnan jáne bir shet memleketten taǵy 133 baıqaýshyny akkredıtteıdi.

«Olardyń ishinde: 130 baıqaýshy - TMD baıqaýshylary mıssııasynan jáne 3 baıqaýshy - Koreıa Respýblıkasynan», - dedi ol.

Aıta keteıik, 4 naýryzdaǵy jaǵdaı boıynsha Ortsaılaýkom eki halyqaralyq uıymnyń mıssııalarynan (EQYU/DIAQB jáne TMD), bir halyqaralyq uıymnan (Islam yntymaqtastyǵy uıymy) jáne 9 shet memleketten 308 baıqaýshyny akkredıttedi.

Sonymen qatar QR Syrtqy ister mınıstrligi 2016 jylǵy 2 naýryzdaǵy jaǵdaı boıynsha 28 memleketten sheteldik buqaralyq aqparat quraldarynyń 116 ókilin akkredıttegen bolatyn.

Shet memleketter men halyqaralyq uıymdardyń baıqaýshylaryn akkredıtteýdi Ortalyq saılaý komıssııasy 2016 jylǵy 14 naýryzǵa deıin júzege asyrady.