QR OSK saılaý qorytyndylaryn jarııalady: Senatqa 16 depýtat saılandy

ASTANA. QazAqparat - 2014 jylǵy 1 qazanda bolǵan Qazaqstan Respýblıkasy Parlamenti Senatynyń depýtattaryn saılaýdyń qorytyndylary anyqtaldy. Bul týraly búgin Astanada QR OSK tóraǵasy Qýandyq Turǵanqulov málim etti.

Oblystyq, Astana jáne Almaty qalalyq saılaý komıssııalarynyń daýystardy sanaý nátıjeleri týraly hattamalarynyń negizinde Qazaqstan Respýblıkasy Ortalyq saılaý komıssııasy 2014 jylǵy 1 qazanda Qazaqstan Respýblıkasy Parlamenti Senaty depýtaty bolyp tómendegiler saılandy dep tanydy:

Aqmola oblysynan - Ákimov Rashıt Qaıyrjanuly; Aqtóbe oblysynan - Taǵymov Marat Myrzaǵalıuly; Almaty oblysynan - Musahanov Ańsar Tursynhanuly; Atyraý oblysynan - Eńsegenov Sársenbaı Qurmanuly; Batys Qazaqstan oblysynan - Muqaev Erbolat Rahmetuly; Jambyl oblysynan - Joldasbaev Muratbaı Smataıuly; Qaraǵandy oblysynan - Ershov Sergeı Mıhaılovıch; Qostanaı oblysynan - Bekturǵanov Serik Shyńǵysuly; Qyzylorda oblysynan - Elamanov Bekmyrza Qaıypuly; Mańǵystaý oblysynan - Bortnık Mıhaıl Mıhaılovıch; Ońtústik Qazaqstan oblysynan - Bektaev Álı Ábdikárimuly; Pavlodar oblysynan - Kóbenov Manap Sharapıdenuly; Soltústik Qazaqstan oblysynan - Perepechına Olga Valentınovna; Shyǵys Qazaqstan oblysynan - Plotnıkov Sergeı Vıktorovıch; Astana qalasynan - Jaqsybekov Serik Ryskeldiuly; Almaty qalasynan - Muqashev Tóleýbek Tóleýuly.

Q. Turǵanqulovtyń sózine qaraǵanda, saılanǵan Senat depýtattarynyń ortasha jasy 56 jasty quraıdy. Olardyń quramynda 7 ınjener, 4 aýyl sharýashylyǵy qyzmetkeri, 2 ekonomıst, 2 oqytýshy jáne 1 zańger bar.

Daýys berý jáne daýystardy sanaý barysyn barlyǵy 387 adam, sonyń ishinde úmitkerlerdiń senim bildirgen ókilderi, Qazaqstannyń saıası partııalarynyń, birlestikteriniń jáne buqaralyq aqparat quraldarynyń ókilderi baqylady.

«Olardyń aldyn ala baǵalaýynsha, saılaý naýqany uıymshyldyqpen, ashyq jáne demokratııalyq jaǵdaıda ótti. Saılaý úderisine qatysýshylardyń barlyǵy da quqyqtyq keńistik aıasynda jáne eldiń saılaý zańnamasyyna sáıkes áreket etti», - qorytyndylady sózin Q.Turǵanqulov.