QR OSK Prezıdenttikke úmitkerdiń lıngvıstıkalyq emtıhanynyń nátıjelerine qatysty túsinikteme berdi
Ótkizilgen emtıhan nátıjeleri boıynsha lıngvıstıkalyq komıssııa ashyq daýys berý arqyly kópshilik daýyspen Qazaqstan Respýblıkasynyń Prezıdenttigine kandıdat Asqar Jorabaıuly Syrǵabaev memlekettik tildi erkin meńgermegen degen sheshim qabyldady.
Bul sheshimdi túsindire otyryp, komıssııanyń tóraǵasy M.Joldasbekov: «Jyldan-jylǵa elimizde memlekettik tildiń qoldanylý aıasy keńeıip, ony meńgerýge qoıylatyn talaptardyń da artyp kele jatqandyǵy belgili. Úmitker búgingi kúnniń lıngvıstıkalyq talaptary turǵysynda tildi erkin meńgerý dárejesin aıqyndaýǵa múmkindik beretin úsh túrli sıpattaǵy tapsyrmany oryndady.
Birinshi jazbasha tapsyrmada kandıdat ózi tańdaǵan «Álemdik daǵdarys jáne Qazaqstan ekonomıkasy» taqyrybyn asha almady, óziniń oıyn naqty jáne júıeli jetkize almady, jalpy 92 orfografııalyq, stılıstıkalyq jáne pýnktýatsııalyq qate jiberdi.
Ekinshi tapsyrma boıynsha B.Momyshulynyń «Ushqan uıa» kitabynan mátindik úzindi oqý kezinde birqatar orfoepııalyq normalardy buzǵandyqtan, oqylǵan úzindi maǵynasynyń qabyldanýyn qıyndatty jáne daýys yrǵaǵyna salyp, mánerlep oqı almady.
Úshinshi tapsyrmada komıssııa belgilegen kópshiliktiń aldynda 15 mınýt sóz sóıleýdiń ornyna kandıdat 9 mınýt sóıledi, óz oıyn baılanysty, júıeli jáne qısyndy túrde erkin jetkize almady. Qazaq tiliniń erekshelikterin eskermeı sóılegen sózi orys mátininiń sózbe-sóz aýdarmasy boldy. Nátıjesinde lıngvıstıkalyq komıssııa úmitker memlekettik tildi erkin meńgermegen dep biraýyzdan sheshim qabyldady»,- dep atap ótti komıssııa tóraǵasy.
Lıngvıstıkalyq komıssııanyń otyrysyna Qazaqstan Respýblıkasy Ortalyq saılaý komıssııasynyń múshesi L.J.Súleımen qatysty.