QR OSK: Prezıdent saılaýyna qatysty 11 myńǵa jýyq materıal jarııalandy

ASTANA. QazAqparat - QR Ortalyq saılaý komıssııasy Prezıdent saılaýyna oraı buqaralyq aqparat quraldarynda jarııalanǵan materıaldarǵa júrgizilgen monıtorıngtiń aralyq qorytyndysyn jarııalady.

«Monıtorıng 53 respýblıkalyq baspa basylymyn, 16 respýblıkalyq telearnany, 179 óńirlik baspa basylymyn, 29 óńirlik telearnany, sondaı-aq 7 aqparat agenttigi men 117 neǵurlym tanymal qoǵamdyq-saıası ınternet-resýrsty qamtıdy. Áleýmettik jelilerde monıtorıng 200-den astam qoǵamdastyq pen qoǵamdyq pikir jetekshileriniń 250 paraqshasyn, Youtube beıneportalyndaǵy 30 paıdalanýshy arnalardy, Twitterdegi ózekti heshtegter lentasyndaǵy jańartýlardy qamtydy»,- delingen OSK habarlamasynda.

2015 jylǵy 25 aqpannan 25 naýryzǵa deıingi kezeńde respýblıkalyq jáne óńirlik BAQ-tar saılaý taqyryby jóninde 10990 materıal jarııalady. Respýblıkalyq telearnalarda efırge 1473 sıýjet (21 %), gazetterde 731 maqala (10 %), al ınternet-resýrstarda 4850 jarııalanym (69 %) ornalastaryldy.

Óńirlik BAQ-tarda jalpy alǵanda saılaýǵa baılanysty 3936 materıal jarııalandy. Olardyń ishinde 1582 sıýjet (40 %) telearnalar efırine shyqty, 1637 (42% ) baspa basylymdarynda jarııalandy jáne 717 (18 %) materıal ınternet-resýrstarda salynǵan.

Buqaralyq aqparat quraldary lıngvıstıkalyq komıssııanyń qyzmetine jáne Prezıdenttikke usynylǵan úmitkerlerdiń Prezıdenttikke kandıdattarǵa qoıylatyn Konstıtýtsııa men saılaý týraly zańnyń talaptaryna sáıkestigin anyqtaý protsesine belsendi qyzyǵýshylyq tanytty. Kandıdattardy qoldap qol jınaý rásimine, olardyń rastyǵyn tekserý jáne usyný qorytyndylaryna qazaqstandyq BAQ 800-den astam materıal arnady. Prezıdenttikke kandıdattardy tirkeý qorytyndylary, saılaýaldy úgitti júrgizý tártibi men sharttary týraly 400-ge jýyq materıal jarııalandy.