QR OSK Májilis depýtattary saılaýynyń jalpy qorytyndysyn 27 naýryzdan keshiktirmeı anyqtaıdy
Onyń aıtýynsha, Qazaqstan halqy Assambleıasy saılaıtyn Parlament Májilisiniń depýtattaryn saılaýǵa oraı Assambleıa sessııasy 21 naýryz kúni saǵat 08:00-de bastalady. Daýys berýge arnalǵan pýnkt Assambleıanyń sessııasy ótetin ǵımaratta ornalastyrylady jáne Sessııa jumysynyń bastalýynan bir saǵat buryn, ıaǵnı saǵat 07:00-de ashylady. Daýys berýge arnalǵan pýnktte ol ashylǵan sátten bastap daýys berý nátıjeleri anyqtalǵanǵa deıin halyqaralyq jáne qazaqstandyq baıqaýshylar, buqaralyq aqparat quraldarynyń ókilderi, sondaı-aq Assambleıa saılaıtyn Májilis depýtattyǵyna kandıdattardyń senim bildirilgen adamdary qatysýǵa quqyly.
«Assambleıanyń jumysyna onyń músheleriniń jalpy sanynyń úshten eki bóligi qatysqan jaǵdaıda, ol ótkizilgen bolyp esepteledi. Búgingi kúni Qazaqstan halqy Assambleıasynyń quramynda 446 múshe bar. Sessııada Astana qalasynyń qalalyq saılaý komıssııasynyń tóraǵasy daýys berýdi ótkizý tártibin túsindirgennen keıin Assambleıa múshelerin daýys berýge arnalǵan pýnktke shaqyrady. Saılaý bıýlletenine Májilis depýtattyǵyna tirkelgen 9 kandıdattyń barlyǵy engiziledi. Daýys berýge arnalǵan saılaý bıýlleteni Assambleıa múshesine saılaýshylar tiziminiń negizinde onyń jeke basyn kýálandyratyn qujatty usynǵanda beriledi. Ár saılaýshy jeke ózi daýys beredi», - dedi ol.
M.Sársembaevtyń sózine qaraǵanda, daýys berý jáne daýystardy sanaý aıaqtalǵannan keıin qalalyq saılaý komıssııasy daýys berý nátıjeleri týraly hattama jasap, qol qoıady. Daýys berýge qatysqan Assambleıa músheleriniń 50 paıyzdan joǵary daýysyn jınaǵan kandıdattar saılanǵan bolyp esepteledi. Sessııa qalalyq saılaý komıssııasynyń tóraǵasy daýys berý nátıjeleri týraly hattamany jarııa etkennen soń jabylady.
«Qalalyq saılaý komıssııasynyń hattamasy Ortalyq saılaý komıssııasyna saılaý ótken kúnnen eki kúndik merzimnen, 22 naýryzdan keshiktirmeı usynylady. Saılanǵan Májilis depýtattaryn tirkeýdi OSK júzege asyrady», - dedi OSK múshesi.
Sonymen qatar ol Májilis depýtattaryn saılaýdyń jalpy respýblıka boıynsha qorytyndylaryn Ortalyq saılaý komıssııasy 2016 jylǵy 27 naýryzdan keshiktirmeı anyqtaıtyndyǵyn, al saılaý qorytyndylary týraly habar BAQ-ta 30 naýryzdan keshiktirmeı jarııalanatyndyǵyn eske saldy.