QR OSK kandıdattardyń saılaý qory mólsherin jarııa etti

ASTANA. QazAqparat - Kezekten tys Prezıdenttik saılaýǵa partııa atynan usynylǵan kandıdatqa qaraǵanda ózin-ózi usynylǵan kandıdattyń saılaý qory birshama tómen bolady. Bul týraly búgin QR Ortalyq saılaý komıssııasynda ótken brıfıngte komıssııa hatshysy Baqyt Meldeshev málim etti.

«Kandıdattar saılaý qoryn ózderi qurady. Qorǵa ózderiniń jeke qarajatyn paıdalana alady. Paıdalanatyn jeke qarajatynyń somasy da zańda belgilengen. Ol 106 mln. 820 myń teńgeni quraıdy», - dedi ol.

B.Meldeshevtiń atap ótýinshe, eger kandıdatty saıası partııa usynsa, onda uıym da 149 mln. 548 myń teńge qarjy bóledi. Sonymen qatar kez kelgen azamat ózi qalaǵan kandıdatqa qarjy berýine quqy bar. Biraq onyń somasy 320 mln. 460 myń teńgeden aspaýy kerek.

«Jalpy aıtqanda, osy saılaýdaǵy ár kandıdattyń saılaý qory 576 mln. 828 myń teńge mólsherinde bolýy kerek. Odan aspaýy tıis. Al ózin-ózin usynǵan azmattardyń úgitke shyǵystary tómendeý bolady. Óıtkeni, ol kandıdatta partııa qarjysy bolmaıtyndyǵy túsinikti jaıt. Sondyqtan onyń somasy 427 mln. 280 myń teńgeni quraıdy», - dedi OSK hatshysy.