QR Ortalyq saılaý komıssııasy taǵy 217 baıqaýshyny akkredıttedi
15:17, 17 Sáýir 2015
ASTANA. QazAqparat - Búgin QR Ortalyq saılaý komıssııasynyń otyrysy ótip, onda 2015 jyldyń 26 sáýirine belgilgengen kezekten tys QR Prezıdent saılaýyna shet memleketter men halyqaralyq uıymdardyń baıqaýshylaryn akkredıtteý týraly qaýly qabyldady.
Qaýly jobasyn tanystyrǵan QR OSK múshesi Tatıana Ohlopkovanyń aıtýynsha, elimizdiń Ortalyq saılaý komıssııasy QR Syrtqy ister mınıstrliginiń usynysymen 4 halyqaralyq uıym men 6 shet memleketten taǵy 217 baıqaýshyny akkredıtteýi tıis.
«Olardyń 166-sy - Saılaýdy baıqaý jónindegi EQYU/DIAQB-nyń mıssııasynan, 35-i - TMD baıqaýshylary mıssııasynan, 2-eýi - ShYU baıqaýshylary mıssııasynan, 1-eýi - Túrkitildes elderdiń Parlamenttik Assambleıasynan, sondaı-aq úsh baıqaýshydan - AQSh, Mońǵolııa jáne Latvııa Respýblıkasynan, 2 - Koreıa Respýblıkasynan jáne bir-birden -Belgııa Koroldigi men Ispanııa Koroldiginen», - dedi ol.
QR Ortalyq saılaý komıssııasynyń músheleri qaýly jobasyn biraýyzdan maquldady.