QR Ortalyq saılaý komıssııasy esepten shyǵarý kýálikteri týraly túsinik berdi
Kún tártibindegi osy taqyryp boıynsha Ortsaılaýkom tóraǵasynyń orynbasary Konstantın Petrov baıandama jasady. Ol saılaý zańnamasyna sáıkes, saılaýshy óziniń bolatyn jerin aýystyrǵan kezde bıylǵy 26 jeltoqsannan bastap 2021 jylǵy 9 qańtardaǵy saǵat 18:00-ge deıin daýys berý quqyǵyn beretin esepten shyǵarý kýáligin alýǵa quqyly ekenin habarlady. Esepten shyǵarý kýáligin tıisti saılaý komıssııasy ótinish pen jeke kýálikti usyný negizinde beredi. Daýys berý quqyǵyn beretin esepten shyǵarý kýáligin kórsetken kezde ýchaskelik saılaý komıssııasy daýys beretin kúni saılaýshyny onyń bolatyn jeri boıynsha saılaý ýchaskesindegi saılaýshylar tizimine engizedi. Saılaýshynyń esepten shyǵarý kýáligin alýǵa bergen ótinishi saılaýshylar tizimine qosa beriledi jáne ony tıisti saılaý ýchaskesi boıynsha saılaýshylar tiziminen shyǵarý úshin negiz bolyp sanalady. Joǵalyp qalǵan esepten shyǵarý kýálikteri qalpyna keltirilmeıdi, sondaı-aq olardyń telnusqalary berilmeıdi.
OSK málimetine qaraǵanda, saılaýshy, eger esepten shyǵarý kýáligi bir eldi mekenniń shegindegi basqa saılaý ýchaskesinde berilgen bolsa, saılaýshylardyń tizimine engizilmeıdi. Eger esepten shyǵarý kýáligin basqa saılaý okrýginiń ýchaskelik saılaý komıssııasy berse, saılaýshy oblystyq, qalalyq, aýdandyq máslıhat depýtattaryn saılaý kezinde daýys berýge arnalǵan bıýlletenderdi almaıdy.
Saılaýshy esepten shyǵarý kýálikteriniń ár túrli sanyn ala alady jáne ol turǵan jeri boıynsha sol jerdegi saılaý okrýgteriniń sheginde jaramdy esepten shyǵarý kýálikteriniń sanyna teń saılaý bıýlletenderiniń sanyn alady.
Máselen, saılaýshy oblystyń bir aýdanynyń sheginde óziniń bolatyn ornyn aýystyrǵan kezde, saılaýshy Parlament Májilisiniń, oblystyq máslıhattyń jáne aýdandyq máslıhattyń depýtattaryn saılaýǵa qatysa alady jáne tıisinshe bolatyn jerinde úsh esepten shyǵarý kýáliginiń ornyna – úsh saılaý bıýlletenin alady.
Saılaýshy óziniń bir oblys (biraq basqa aýdan, qala) sheginde bolatyn ornyn aýystyrǵan kezde, ol Parlament Májilisi men oblystyq máslıhat depýtattaryn saılaýǵa qatysady jáne tıisinshe bolatyn jerinde eki esepten shyǵarý kýáliginiń ornyna – eki saılaý bıýlletenin alady. Oblystan tys jerlerde saılaýshy Parlament Májilisi depýtattarynyń saılaýyna qatysady jáne tıisinshe bolatyn jerinde bir esepten shyǵarý kýáliginiń ornyna – bir saılaý bıýlletenin alady.
Berilgen esepten shyǵarý kýálikterin esepke alýdy jetildirý maqsatynda bir mezgilde birneshe saılaý ótkizgen kezde, Ortalyq saılaý komıssııasy saılaýdyń árbir túri boıynsha esepten shyǵarý kýáliginiń ártúrli túsin belgileıdi, árbir esepten shyǵarý kýáliginde saılaý naýqanynyń ataýy kórsetiledi.
Birinshi máseleni qaraý qorytyndysyn shyǵara otyryp, QR Ortalyq saılaý komıssııasynyń tóraǵasy Berik Imashev saılaýshylardy quqyqtyq belsendilik tanytýǵa, óziniń belsendi saılaý quqyǵyn iske asyrý úshin zańdyq máni bar is-áreketterdi júzege asyrýǵa shaqyrdy.