QR Olımpıada quramasynyń kıim úlgisi dızaıny konkýrsynyń jeńimpazdary anyqtaldy
14 qazan kúni Qazaqstan UOK 2020 jyly Tokıo Olımpıadasyna qatysatyn Qazaqstan Ulttyq qurama komandasynyń paradtyq jáne sporttyq kıim úlgisiniń dızaınyna ashyq konkýrs bastalǵanyn jarııalaǵan bolatyn. Nátıjesinde 19 qatysýshy jumysyn jiberip, olar UOK saıtyna shyǵaryldy. Jeńimpazdardy arnaıy komıssııa quramy anyqtady. Onyń quramyna Qazaqstan UOK sport dırektsııasy men Ulttyq paralımpıadalyq komıtetiniń ókilderi, Qazaqstan UOK sportshylar komıssııasynyń músheleri kirdi. Komıssııanyń qorytyndy otyrysy boıynsha «KazSPO -N» JShS Zibroo Active Sportswear «sporttyq forma» jáne «Marino Madi» OOO «paradtyq forma» jeńimpaz dep tanyldy. Baıqaý jeńimpazdary arasynda olımpıadalyq forma dızaınynyń, tehnologııalyq talaptarynyń (mata, kerek-jaraqtar, gıgroskopııa, memlekettik rámizderdi qoldaný jáne t.b.) túpkilikti tujyrymdamasy boıynsha odan ári jumys júrgiziletin bolady. Paradtyq jáne sporttyq kıim úlgisin bekitý úshin Qazaqstannyń Olımpıadalyq qurama komandasynyń ókilderinen turatyn arnaıy komıssııa qurylady. «Komıssııa óte jaqsy jumys istedi. Konkýrsqa qatysýshylar olımpıadalyq formanyń bir emes, birneshe dızaın nusqasyn usyndy. Qatysýshylardyń barlyǵy qazaqstandyq dızaınerler boldy. Biz úshin bul óte qýanyshty jaǵdaı. Sebebi, olımpıadalyq formany daıyndaýda otandyq mamandardyń ónimderin qoldaý bizdiń basty maqsatymyz bolatyn.
Aıta keterligi, tańdalǵan jumystar HOK-tyń barlyq talap-nusqalaryna sáıkestendirilip áli de jetildiriledi. Al sońǵy sheshimdi 2020 jyly Tokıoda ótetin jazǵy Olımpıada oıyndaryna qatysatyn sportshylardyń ózderi tańdaıtyn bolady», - deıdi UOK resmı ókili Jiger Ázbergenov.
Qazaqstan ulttyq qurama komandasynyń olımpıadalyq formasynyń dızaıny bıyl jazda Qazaqstan UOK resmı tanystyrylymynda kórsetiletin bolady.