QR MSM jaýapty hatshysy men vıtse-mınıstrleri «Qaztest» synaǵynan ótýde

ASTANA. QazAqparat - Búgin QR Mádenıeti jáne sport mınıstrliginiń barlyq qurylymdyq bólimsheleri men vedomstvolyq baǵynyshty mekemeleriniń qyzmetkerleri memlekettik tildi meńgerý deńgeıin baǵalaý synaǵyn tapsyrýǵa kiristi.

Test tapsyrýshylardyń qatarynda mınıstrliktiń jaýapty hatshysy Qýatjan Ýálıev jáne vıtse-mınıstrleri Marat Ázilhanov men Ǵalym Ahmedıarov bar.

«Tilderdi damytý men qoldanýdyń 2020 jylǵa deıingi baǵdarlamasy aıasynda is-sharalar odan ary jalǵasýda. Memlekettik baǵdarlamanyń negizgi bóliginiń biri - memlekettik tildi meńgerý. Onyń negizi quraly «Qaztest» júıesi bolyp tabylady. Ol óte sapaly daıyndalǵan 5 deńgeıli júıe. Ózderińizge málim, «A» korpýsy deńgeıindegi qyzmetkerler qyzmetke qabyldanýy úshin memlekettik tildi meńgerýin anyqtaý testinen ótedi», - dedi ol.

Vıtse-mınıstrdiń atap ótýinshe, barlyq memlekettik organdarda dıagnostıkalyq testileý arqyly memlekettik tildi meńgerý deńgeıin anyqtaý júrgiziledi. Bul rette Mádenıet jáne sport mınıstrligi bul jumystardy eń birinshi bolyp qolǵa alýda.

«Qazir bizdiń ortalyq apparatta 200-ge jýyq qyzmetker osy dıagnostıkadan ótip boldy. Sonymen birge bizge qarasty basqa ortalyqtar, mekemelerdiń de 8 myńnan astam qyzmetkeri osy testen ótýde. Bizdiń maqsatymyz - ár qyzmetkerdiń memlekettik tildi bilý deńgeıin anyqtaý jáne tolyq meńgermegen azamattarmen oqytý jumystaryn jalǵastyrý»,- dedi M.Ázilhanov.

Onyń atap ótýinshe, mınıstrlik qyzmetkerleriniń «Qaztest» nátıjesi maýsym aıynda shyǵarylatyn bolady.