QR MSM «Qazaqfılmmen» negizsiz kelisimshart jasasqan - Esep komıteti

ASTANA. QazAqparat - QR Mádenıet jáne sport mınıstrligi «Qazaqfılm» kınostýdııasymen negizsiz kelisimshart jasasqan. Bul týraly Respýblıkalyq bıýdjettiń atqarylýy jónindegi esep komıtetiniń kezekti otyrysynyń qorytyndysyna oraı jarııa etilgen aqparatta aıtylǵan.

«Jekelegen bıýdjettik baǵdarlamalary júzege asyrý úshin QR Mádenıet jáne sport mınıstrligimen oǵan baǵynyshty uıymdarǵa bólingen bıýdjet qarjysynyń paıdalaný tıimdiliginiń qorytyndysy shyǵaryldy», - dep habarlady atalǵan komıtet baspasóz qyzmetinen.

Vedomstvonyń aqparatyna qaraǵanda, 2013-2015 jyldary aralaǵynda mınıstrlik memlekettik satyp alýlar týraly zańnama normalaryn qoldanbastan «Qazaqfılm» AQ-men jalpy somasy 5824,1 mln. teńgege arnalǵan fılmder óndirisi týraly kelisimshart jasasqan.

Munan bólek, 2013-2014 jyldary aralyǵynda mınıstrlik ózine qarasty teatrlar men mýzeılerge belgilengen somadan asyp túsetin 1739,6 mln. teńge aýdarǵan. 2015 jyly sýdsıdııalaýǵa kirmeıtin Ulttyq mýzeıge negizsiz 514,7 mln. teńge bólingen.

Sonymen qatar esep komıtetiniń aqparatyna qaraǵanda, elimizdiń sportshylaryn daıyndaıtyn jattyqtyrýshylardyń shamamen 30 paıyzy belgilengen biliktilik talaptaryna saı kelmeıdi.

«Esep komıteti anyqtaǵan bıýdjettik jáne basqa da zańnama buzýshylyqtardyń jalpy somasy 52313,1 mln., tıimsiz paıdalanǵa qarjy 1 832,2 mln. teńgeni quraıdy», - delingen vedomstvo aqparatynda.