QR MKK kontragentterdi tekserý servısiniń nelikten aqyly bolǵanyn túsindirdi

NUR-SULTAN. QazAqparat – QR Qarjy mınıstrligi Memlekettik kirister komıtetiniń ókilderi «Atameken» UKP-nyń kontragentterdi tekserý servısiniń aqyly bolǵanyn túsindirdi, dep habarlaıdy QazAqparat.

Komıtettiń baspasóz qyzmetiniń habarlaýynsha, «Bıznes-seriktesterdiń tizilimi» aqparattyq júıesi Úkimettiń 2020 jylǵy 10 shildedegi keńeıtilgen otyrysynyń qorytyndylary boıynsha Memleket basshysynyń tapsyrmalaryn oryndaý sheńberinde «tıisti saqtyq qaǵıdatyn engizýdi qamtamasyz etý jáne kontragentterdi derbes tekserý úshin bıznes sýbektileri boıynsha ashyq ıntegratsııalanǵan derekter bazasyn qurý» tarmaǵymen quryldy.

«Tıisti saqtyq» qaǵıdatynyń maqsaty - kontragentti tańdaý kezinde kásipkerlerdiń qyraǵylyǵyn arttyrý jáne bir kúndik fırmalardy joıý.

Bul jobanyń bastamashysy «Atameken» UKP, sonymen qatar, málimetter úshin aqy alý máselesi de osy atalǵan mekemeniń quzyrynda.

«Qazaqstan Respýblıkasynyń Ulttyq kásipkerler palatasy týraly» 2013 jylǵy 4 shildedegi Qazaqstan Respýblıkasy Zańynyń 14-babyna sáıkes, Qazaqstan Respýblıkasynyń Ulttyq Kásipkerler Palatasy «Bıznes-seriktesterdiń tizilimin» qurady jáne júrgizedi.

​Memlekettik kirister komıteti óz jaǵynan salyq qupııasyn saqtaı otyryp, ındıkatorlar túrinde salyq tóleýshiler boıynsha málimetterdi berýdi ǵana júzege asyrady.

Sonymen qatar, Komıtettiń saıtynda sanattarǵa bólý nátıjeleri boıynsha salyq tóleýshiniń táýekel dárejesin tekserýdiń tegin servısi bar.

Atalǵan másele boıynsha, Memlekettik kirister komıteti qandaı da bolmasyn aqyly qyzmetter kórsetpeıdi.

Salyq tóleýshige qatysty jáne salyq qupııasyna jatpaıtyn barlyq málimetter Komıtettiń resmı saıtynda jarııalanady.