QR MQІA: Bıyl elimizde 174 laýazym ıesi ákimshilik jaýapqa tartyldy

NUR-SULTAN. QazAqparat – QR Memlekettik qyzmetisteri agenttiginiń aýmaqtyq departamentteri ruqsat merzimderin, berý tártibin buzǵany, sondaı-aq olardy berýden negizsiz bas tartqany úshin ákimshilik quqyq buzýshylyq týraly 102 hattama toltyrdy.

Bul týraly QazAqparat atalmysh vedomstvonyń baspasóz qyzmetine silteme jasap habarlaıdy.

Baspasóz qyzmetiniń málimetterine qaraǵanda, mamandandyrylǵan aýdanaralyq ákimshilik sottardyń qaraý qorytyndysy boıynsha, sondaı-aq qysqartylǵan tártipte 102 ákimshilik hattama boıynsha ákimshilik jaýapqa 174 laýazymdy adam tartyldy (OMO–12, JAO–42 qyzmetkerleri).

Jalpy, aǵymdaǵy jyly memleket kirisine aıyppul túrinde 3,4 mln. teńge óndirildi.

«Osylaısha, Mádenıet jáne sport mınıstrligi Týrızm ındýstrııasy komıtetiniń tóraǵasy men tóraǵa orynbasary, Ádilet mınıstrliginiń departament dırektory, 8 ortalyq memlekettik organdar vedomstvolary bólimsheleriniń basshylary (Ulttyq ekonomıka mınıstrligi tabıǵı monopolııalardy retteý, Aýyl sharýashylyǵy mınıstrligi agroónerkásiptik keshendegi memlekettik ınspektsııa, Ekologııa, geologııa jáne tabıǵı resýrstar mınıstrliginiń orman sharýashylyǵy jáne janýarlar dúnıesi, Indýstrııa jáne ınfraqurylymdyq damý mınıstrliginiń kólik, Densaýlyq saqtaý mınıstrliginiń sanıtarlyq-epıdemıologııalyq baqylaý komıtetteri)), Aqtóbe, Túrkistan jáne Qyzylorda oblystary ákimdikteriniń 3 oblystyq basqarmalarynyń (Aýyl sharýashylyǵy, jer qatynastary, tabıǵı resýrstar jáne tabıǵat paıdalanýdy retteý) basshylary, Jambyl oblysy Qordaı, Moıynqum aýdanynyń ákimderi, 4 aýyldyq okrýgtiń ákimderi, 23 jer qatynastary bóliminiń basshylary, 5 sáýlet jáne qala qurylysy bóliminiń basshylary, 2 aýdan ákimdikteriniń laýazymdy tulǵalary ákimshilik jaýapqa tartyldy»,-delingen QR Memlekettik qyzmet isteri agenttiginiń baspasóz qyzmeti taratqan aqparatta.