QR Memlekettik qyzmet isteri mınıstrligi qaıta uıymdastyryldy
«Qazaqstan Respýblıkasynyń Memlekettik qyzmet isteri mınıstrligin qaıta uıymdastyrý týraly» Jarlyq
Qazaqstan Respýblıkasy Konstıtýtsııasynyń 44-baby 3), 5) tarmaqshalaryna, «Qazaqstan Respýblıkasynyń Prezıdenti týraly» Qazaqstan Respýblıkasy Konstıtýtsııalyq Zańynyń 17-1-babyna sáıkes, Memlekettik qyzmet júıesi men sybaılas jemqorlyqqa qarsy is-qımyldy odan ári jetildirý maqsatynda qaýly etemin:
1. Qazaqstan Respýblıkasynyń Memlekettik qyzmet isteri mınıstrligi ony Qazaqstan Respýblıkasynyń Prezıdentine tikeleı baǵynatyn jáne esep beretin memlekettik organ retinde Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttigi etip qaıta qurý jolymen qaıta uıymdastyrylsyn.
Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttigi memlekettik qyzmet, sybaılas jemqorlyq kórinisteriniń júıeli aldyn alý jáne memlekettik kórsetiletin qyzmetterdiń sapasynyń saqtalýyn baqylaý salasyndaǵy ýákiletti memlekettik organ bolyp tabylady dep belgilensin.
2. Qazaqstan Respýblıkasynyń Memlekettik qyzmet isteri mınıstrliginiń Sybaılas jemqorlyqqa qarsy is-qımyl ulttyq bıýrosy Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttiginiń Sybaılas jemqorlyqqa qarsy is-qımyl ulttyq bıýrosy bolyp qaıta qurylsyn.
Sybaılas jemqorlyqqa qarsy is-qımyl ulttyq bıýrosy atalǵan Agenttiktiń qurylymynda vedomstvo mártebesine ıe bolady jáne quqyq buzýshylyqtardyń aldyn alýdy, anyqtaýdy, jolyn kesýdi, ashýdy jáne tergeýdi júzege asyratyn quqyq qorǵaý organy bolyp tabylady dep belgilensin.
3. Qazaqstan Respýblıkasynyń Úkimeti Qazaqstan Respýblıkasy Prezıdentiniń Ákimshiligimen birlesip bir aı merzimde osy Jarlyqtan týyndaıtyn sharalardy qabyldasyn.
4. Osy Jarlyq qol qoıylǵan kúninen bastap kúshine enedi.
Qazaqstan Respýblıkasynyń
Prezıdenti N.Nazarbaev
Astana, Aqorda, 2016 jylǵy 13 qyrkúıek
№ 328