QR Memlekettik kirister komıteti kásiporyndardy daǵdarystan shyǵarý joldaryn túsindirdi

ASTANA. QazAqparat - Eger kásiporynnyń qaryzdary bolsa, olar bankrottyqqa barýǵa mindetti emes. Bul týraly Ortalyq kommýnıkatsııalar qyzmetindegi baspasóz máslıhatynda QR Qarjy mınıstrligi Memlekettik kirister komıteti salyqtyq baqylaý departamentiniń dırektory Erlan Nurlanbaev málim etti.

«Zańdaǵy negizgi baǵyttardyń biri tólem qabiletsizdigin retteýge arnalǵan. Eger de kásiporynda qaryzdary bolsa, oǵan bankrottyqqa barý mindet emes. Zańnama aıasynda boryshkerge nesıe berýshimen kelisimge kelý múmkindikteri bar, osy rette qaryzdy óteýdiń joldary men merzimderi eskerilgen. Bul baǵytta eki aı ýaqyt beriledi. Sonymen birge turaqsyzdyq tólemi eseptelmeıdi jáne eshqaısy bankrottyqqa bere almaıdy»,-dep túsindirdi E. Nurlanbaev zańnamadaǵy jańashyldyqtardy.

Qol jetkizilgen kelisim sotpen bekitilip, boryshker óziniń qyzmetine oralady. Nesıe berýshige qaryzdy óteý bekitilgen kestege sáıkes iske asyrylady.

Sonymen qatar Zańdaǵy basqa bir baǵyty bankrottyqtan kásiporyndy ońaltýǵa aýystyrýǵa qatysty.

«Boryshker kásiporynnyń ıesinde óziniń bıznesin qaryzdan shyǵaryp alý múmkindigi týsa da, alaıda  bankrottyq tetikteri iske qosylǵan kezder bolady.  Qabyldanǵan zań bankrottyqtan ońaltýǵa kóshý qadamdaryn qamtyp otyr. Osy rette tek saýyqtyrý josparyn ázirlep, ony barlyq nesıe berýshilermen kelistirip, sotqa baǵyttaý kerek»,-dep naqtylady Nurlanbaev.

«Munymen qosa, Zańda boryshkerge bankrottyqtyń kez kelgen kezeńinde barlyq qaryz berýshilermen bitimge kelý kelisimin bekitý múmkindigi qarastyrylǵan. Bul turǵyda jalaqy boıynsha qaryzdar ótelýi tıis. Sot tarapynan atalǵan kelisim bekitilgennen keıin boryshkerdi bankrot dep taný sheshimi iske asyrylmaıdy»,-dedi  departament basshysy.

Budan bólek, zańnamada bankrot kompanııany satý men onyń menshik ıesin aýystyrý múmkindigi eskerilgen. Osy rette barlyq nesıe berýshiler aldynda qaryz ótelgennen keıin kásiporyn bankrottyq kezeńinen shyǵarylady.