QR Memlekettik hatshysy Jambyl eskertkishine gúl shoǵyn qoıdy

NUR-SULTAN. QazAqparat – Elordada J. Táshenov jáne Amman kósheleriniń qıylysynda Jambyl Jabaevtyń eskertkishine gúl shoǵyn qoıý rásimi ótti, dep habarlaıdy QazAqparat tilshisi.

Sharaǵa QR Memlekettik hatshysy Qyrymbek Kósherbaev, Mádenıet jáne sport mınıstri Aqtoty Raıymqulova, Nur-Sultan qalasynyń ákimi Altaı Kólginov, aqyn-jazýshylar, jambyltanýshylar jáne qoǵam qaıratkerleri qatysty.

Sonymen birge, Jambyl oblysynan arnaıy delegatsııa keldi. Aqynnyń aty berilgen oblysta da mereıtoıǵa arnalǵan úlken keshendi jospar bar.

«Búgingi sharanyń jastarǵa úlken tárbıelik máni bar. Ádette Jambyl Jabaev kim degende, aqyn, jyraý, aıtysker dep aıtamyz. Onymen shektelýge bolmaıdy. Mysaly byltyr Abaı jyly bolǵanda Memleket basshysy «Abaı jáne HHІ ǵasyr» maqalasynda Abaıdy aqyn retinde ǵana emes, oıshyl, fılosof, ǵalym retinde kórsetý keregin aıtty. Jambyl Jabaevty da jaı ǵana aıtysker emes, úlken qaıratker retinde kórsetý mańyzdy. Mysaly Jambyl Jabaev – qazaq aýyz ádebıteiniń negizin qalaýshy, sol salada úlken orny bar. Ol qazaq aıtysynyń áleýmettik-saıası mánine basa nazar aýdarǵan tulǵa», - dedi Jambyl oblysy máslıhatynyń hatshysy Mahmetqalı Sarybekov tilshilerge bergen suhbatynda.

Aıta keteıik, keshe Jambyl Jabaevtyń 175 jyldyq mereıtoıyn daıyndaý jáne ótkizý jónindegi memlekettik komıssııanyń alǵashqy otyrysy ótti. Mereıtoılyq jyl ishinde respýblıka boıynsha 500-ge jýyq áleýmettik, ımıdjdik, ǵylymı, tanymdyq is-sharalar ótkiziledi. Budan bólek, aqyn ómirinen derekti fılm túsirý, óleńderiniń jańa jınaqtaryn shyǵarý, aıtystar men ádebı konkýrstardy, kitap kórmelerin uıymdastyrý, mereıtoılyq moneta, poshta markasyn ázirleý jáne basqa da sharalar ótkizý kózdelip otyr.