QR Memlekettik hatshysy shopandar kúnin ótkizý usynysyna qoldaý bildirdi

NUR-SULTAN. QazAqparat – Qazaqstan et jáne sút ónimderin eksporttaıtyn óńirlik iri elge aınalýy tıis. Bul týraly Jazylbek Qýanyshbaevtyń 125 jyldyǵyna arnalǵan «Qazaqstannyń qoı sharýashylyǵy: ótkeni, búgini jáne keleshegi» taqyrybyndaǵy konferentsııada QR Memlekettik hatshysy Qyrymbek Kósherbaev aıtty, dep habarlaıdy QazAqparat tilshisi.

«Qazaqstan et jáne sút ónimderin eksporttaıtyn óńirlik iri elge aınalýy tıis. Egin sharýashylyǵynda sýdy kóp qajet etetin, tıimdiligi tómen daqyldar kólemin qysqartý, olardy kókónis pen maıly jáne azyqtyq ónimdermen almastyrý jolyna betburýymyz kerek. Agrohımıkattardy tıimdi tutynýdyń, qýań jerlerde topyraqty nóldik óńdeýdiń zamanaýı tehnologııalarmen ózge de ınnovatsııalardy qoldanýdy keńeıtýdiń keshendi sharalary qajet», - dedi Qyrymbek Kósherbaev.

Osy rette Memlekettik hatshy «Shopan ata» ulttyq qoı ósirýshiler qaýymdastyǵynyń mal sharýashylyǵy salasynda qoı ósirýshilerge baǵyttalǵan aqparattyq platformasyna nazar aýdararýdy basa aıtty. Bul platforma qoıshy qaýymnyń muń-muqtajyn ortaǵa sala otyryp, jan-jaqty tájirıbe alýǵa baǵyttalǵanyn atap ótti.

«Shopan qaýymynyń mártebesin kóterý jolynda shopandar kúnin ótkizý týraly usynys quptarlyq bastama. Ulttyq qoı ósirýshiler qaýymdastyǵynda búgingi tańda 100-den astam sharýa qojalyǵy tirkelgen. Bul sharýashylyqtardyń artynda kóptegen sharýalar tur degen sóz. Qazaqtyń bolmysy tur, qazaqtyń dástúri tur dep aıtýymyz kerek.

Uly Abaıdyń: Senbe jurtqa, tursa da qansha maqtap,

Áýre etedi ishine qýlyq saqtap.

Ózińe sen, ózińdi alyp shyǵar,

Eńbegiń men aqylyń eki jaqtap», degen sózin árbir otandasymyz jadynda ustasa eken. Sebebi, masyldyq bir ǵana adamnyń ǵana máselesi emes. Kerisinshe, birtutas memleket úshin úlken problema. Sondyqtan árbir azamat óziniń aqylyna súıenip, eńbegine senip ómir súrse, sonda Táýelsizdigine 30 jyl tolǵan Qazaqstannyń qarqyndy damýy men órkendeýine jol ashylady degen sóz», - dedi Memlekettik hatshy.